استيقظ على رنة خفيفة خجولة من جرس بابه الموسيقي .... قام متثاقلاً و شق طرف الباب ليرى شاباً يحمل حقيبة جلدية و دفتر صغير و حدث الحوار التالي :
- صباح الخير يا عمو
- صباح النور ... مين حضرتك ؟
- أنا موظف المالية
- خير ؟؟ ليش دقيت الباب من ؟؟؟ الصبح ؟
- عبنساوي جرد للمدن طلبته منا وزارتنا
- إذا بس جرد ما فيه دفع !!! اتفضل اجرود
- كام واحد انتو بالبيت يا عمو
- أنا و الحرمة ... ولادنا الثلاثة برات البلد
- له له له ... الله يصلحهم .. هي خسرنا تلاتة
- مين انتو اللي خسرتو خيو ... نحن أبوهم و أمهم اللي خسرناهم مو حدا غيرنا
- قصدي خسرتهم الخزينة ....
- ليش خاي ... الخزينة هيي اللي جابتهم و سهرت عليهم الليل و كبرتهم و ربتهم و ساوتهم دكاترة و مهندسين ؟؟؟
- دكاترة و مهندسين ..؟؟ بدهم شغل أكتر !!!!
- لك خاي ... نعسان و بدي أنام خلصني و حاج حكي مالو طعمة ... الخلااااصة ؟
- فيه ضريبة جديدة .. شافها واحد من المفتقين عنا بالفريق الاقتصادي بنومه قام عجبتو و لما فاق صار بدو يعمل إحصاء ليعرف كام مليار بدهن يدخلوا للخزينة .... هي القصة !!!
- أنا بعرف فيه ضريبة دخل و ضريبة اغتراب و ضريبة رفاهية و ضريبة إشغال رصيف و ضريبة بيع و ضريبة شراء و ضريبة رهن و ضريبة آجار و ضريبة أوزون و ضريبة بيئة و ضريبة استيراد و ضريبة تصدير و ضريبة تركات و ضريبة دفن و ضريبة نظافة و ضريبة مازوت و ضريبة ملاكية و ضريبة قيمة مضافة و ضريبة مطاعم و ضريبة مواقف و ضريبة بيوت فاضية.... أكملك و اللا حاج .....؟
- و الله يا عمو هي ضريبتنا اليوم غير كل هل ضرايب ... الضريبة الجديدة اسمها ضريبة حياة !!!
- ليش صرتو تاخدوا ضريبة علنسوان كمان ... على كل حال مرتي اسمها سعاد مو حياة .. الله معك ...
- استنى شوي عمو ... مالها علاقة سعاد و اللا حياة ... هي ضريبة على كل انسان حي يعني ضريبة حياة ...
- اش معنى ؟
- بسبب الحكومة الالكترونية كل شخص حي سيرمز له برقم وطني و تحت هدا الرقم بدو ينضاف كل المعلومات عنه من مواليده اسم ابوه اسم امه اسم اخوته و خواته أسماء ولاده و مهنته و شهاداته و سيرته من أول ما ولد لحد الآن ..... أخد دعم مازوت و الا لأ .... ....يعني عنا 22 مليون حي و كل حي بدو جريدة معلومات ... بدك الدولة تشتغل ببلاش ؟
- دخلك ؟؟ و هدا المسؤول المفتق اللي كل ما بينام بشوف كابوس للشعب !!! قديش بقيلو ليطلع علتقاعد و الله خرب بيتنا بمناماته !!!
- تقاعد ؟؟ لك لساتو شب بنص عمرو !!!
- لك الله @#^*$#& عمرو
- ما علينا !! انتو اثنين بس و تلاتة هربانين برات البلد
- طالعين ليعيشوا صاروا هربانين لبرات البلد !! .... يا سيدي هربانين من ضرايبكم .... يا أخي تعلموا من البلد اللي جنبنا ... سوريا .... عندهم فريق اقتصادي بياخد العقل ... كل همو تخفيف الضرائب عن المواطن .... اش فيه ضريبة علاك مصدي بشيلوها .... همهم راحة المواطن و جيبه يكون مليان و ينام بسبات و نبات و يخلف صبيان و بنات .... و ما عندهم مسؤول في الفريق الاقتصادي بينام و بشوف كوابيس ... كلهم بيشوفوا أحلام وردية و شجر أخضر و عصافير ... من دعاء الناس عليهم .. قصدي لهم
- من وين لوين لنصل لسوريا ... سابقينا بسنين ضوئية .... هل ينفع أن تقارن سويسرا بسوريا
- معك حق .... على كل حال لازم تشوفوا طريقة تخللو مسؤولكم ما ينام أو إذا نام ما يفيق ....
- شكراً عمو على المعلومات .... و إلى اللقاء مع منامات أخرى ( بضم الهمزة )
هنن قالوا رح ياخدوا ضريبة على الموت ،بحيث ما يبقى واحد بهالحياة إلا و يتمناه واليوم وقبل بكرا.. مابعرف بئا مين كلامو الأصح؟ على كل ياخبر بفلوس بكرا ببلاش . و الطيب يتفرج ويقرالنا الفاتحة.
شكرا لك صديقنا المهضوم مالك .. أعجبني تعليق الأخ السيف الدمشقي ينقصنا ضريبة تخلع رقبتنا فعلا .. لكن لم تقل لنا بالنهاية يامالك هل أقروا ضريبة الحياة فعلا أم أنها إشاعات مغرضة كزيادة الرواتب .!؟
كأني فهمت أنك عم تحكي عن فريقنا مهيك بشرفك أنا موذكي وبفهمها عالطاير فإذا كان توقعي مظبوط فكلامك طوط وطوط لأنو فريقنا لحد الآن مسجل 9 / 0 / لصالحو وعامل حسابو بالـ 15 / 0 / يكون قوي وماحدا غيرو عالساحة والباقي كلو يا تحت تحت يافوق فوق والله يجعلنا من يللي فوق لأنو حتى يللي تحت مو سلمان من التركس والكون والكان ولازم تعرف يا مالك أنو في بعدك هالك وقبّاض الأرواح فدير بالك وريح راسك وارتاح
عطول مهضوم كتير وذكي كتير شو بدي علق قريتها تلات مرات وهيي مقال وتعليق ونقد وكلشي وبتحكي لحالها .شكرا كتير واتمنى لك سنة جديدة مليئة بالنجاح والسعادة والصحة
بكل يلي قالتو,مبارح مقال المحروقات السورية واليوم الضرايب وشكلو المقال الجايي عن الكهرباء,شكلك سمعان حكي من (مصادر موثوقة )عن الضرائب(ويلي نسيت تحط بقائمتك فيها ضريبة يلي تخلع رقبتنا)والخطط الجايي,او شكلك انت من الفريق الاقتصادي تبعنا وعم تعمل استطلاع لردات الفعل على هيك نوع من الخطط الاقتصادية الفذة..!!الله يستر!!! تحياتي الك اخ مالك وبانتظار المزيد منك.
لازم تشوفوا طريقة تخللو مسؤولكم ما ينام أو إذا نام ما يفيق .... ما ينام ماخرج ؟؟؟ بس إذا نام ما يفيق !!! هي منيحة
بالعادة أحلام ذاك الاقتصادي السويسري قابلة للتحقق, ومهما فعلت, ومهما نشرت على صفحات سويسرانيوز... والحل ببساطة هو توضيب الحقائب وشد الرحال إلى أقرب محافظة سورية إليك... وعليك الإسراع... فلن تشفع لك الهمزة مهما ضممتها...
مساهمتك السويسرية لا يمكن ان تصير بسوريا..فالحكومة السورية..عفوا السويسرية..تاخذ ضرائب..و لكن الكهرباء مقطوعة و المياه مقننة و الانترنت بطيئة و الشوارع مهترئة و الغابات تُقطع لتصبح حطب بدل من المازوت و المشافي باوهن حالاتها و جامعاتها تُصنف فوق ال6000 على مستوى العالم بالرغم من ان عمر جامعة برن قرن كامل..و الكفاءات السويسرية تغزو العالم..و السويسرون يتزايدون بشكل جنوني..و المزارعيين يتركون لمصيرهم المجهول..عل السويسريون يتعلمون من سوريا..كيف تهتم بالمواطن اولا..و الذي هو اساس البلد و عمادها
واضح أنه تمت كتابة المقال أثناء المنام..لأنه طلباتك من الحكومة السويسرية هي خفض الضرائب..انا ساكون محاميا عن الفريق الاقتصادي السويسري وأسالك..هل الفريق الاقتصادي من جعل سعر الليرة أقصد الدولار ب 46 ليرة أم هو من حافط على سعر صرفها..ولعلمك معظم مشاكلنا سببها سعر صرف الليرة السويسرية لأن الراتب كان محسوبا على الدولار -وسعر كل شيء على الدولار -ولايقل عن باقي الدول الاوربية المجاورة..لذلك اتمنى لك رؤية منامات أفضل أخرى لا أخرى..
بدك وسام عهالقصة ما عدت تمالكت نفسي من الضحك ...أبدع يا عم ولا يهمك ...ويا مالك ما يهزك ريح..ويا مسؤول لا تقرأ قصتو...تحياتي الك..عجبتني من وين لوين لنصل سورية وفعلا ما في مقارنة ..الارقام فلكية
هههههههههههههه سأعود للتعليق شكراً على العرض و بطريقة قمة
انت مانك مصلي عالنبي يامالك المحمول الصيني!! بكرا بتعجبهم الفكرة وبيعملوها... قل ربي اعم أعين المسؤولين عن مساهمة مالك محمول صيني اللهم اجعل من بينهم سدا ومن امامهم سدا ومن خلفهم سدا ومن يمينهم سدا ومن يسارهم سدا واغشهم فهم لايبصرون, اللهم احفظنــا.. طيب وانتو ياسيريانيوز معقول ناشرين هيك مساهمة رح تخلينا نعيش حياة أخرى )؟؟؟ شو بدو يحكي الواحد الله يسامحكم
شكراً للجميع على المرور الخفيف الظل ... بالواقع هذه المقالة كانت محاولة مني لتقمص أفكار أحد مكونات الفريق الاقتصادي الذي مازال و ما فتئ و ما انفك يتحفنا كل طلعة شمس بنوع جديد من الضرائب العويصة على الفهم من قبلي و من قبل جميع فئات الشعب ... ولكنها تطبق فعلاً رغم سوادها الذي يغطي نور الشمس ... أخي عصام ضريبة خلع الرقبة هي نتيجة طبيعية لكل الضرائب الآنفة الذكر في المقال ... و شكراً للجميع