عم تراودك نفسك تتفرج عمسلسل تركي ؟؟

أكيد عندك فضول تعرف ليش مكتسحين هالجماعة الشاشة ..

وأكتر من مرة أجيت بالصدفة وقلبت بهل تلفزيون وطلعلك شي مسلسل تركي فيهن ..

طلعت هيك ودرت وشك يمين ويسار ..

ييي خييي ما في حدا .. لنتفرج لكن ..

يا سيدي أولاً بدي نبهك شو ممكن يطلعلك ..

مثلاً ..

بدك تحضر حالك نفسياً .. أنو هالمسلسل حيرافقك خلال مرحلة طويلة من عمرك ..

ممكن تبلش بأول حلقة وأنت سنة أولى بالجامعة ... وتمر الأيام والليالي وتلاقي حالك متخرج مع الحلقة الأخيرة ..

حتلاقي عندك القصة خليط من مكسيكي على هندي مع شوية مصري على هوليود

البطل ( عزّت ) _ لا تسألوني مين هاد _

بتحبو ( جلنار وسميحة وفوزية وردينة وملك وفادية وقمر )

والبطلة ( بديعة ) _ كمان لا تسألوني مين هي _

بيحبها ( رائد وقتيبة وأحمد وبشير وصبحي وماهر وعدنان )

و(عزّت )بيحب ( بديعة ) بس (أماني ) خارطة مشطو و ( بثينة ) عم تحكش ببالو

و(بديعة) بتحب (عزّت ) بس عم تستنا جوزا (ضرغام ) ليموت

وابن الجيران ( كمال ) حلو كتير مو صخيانة تشيل عينها عنو

وعندك المسلسل مرن كتير اذا ماتت بديعة فجأة بشي جلطة غير مبررة بنص المسلسل عادي كتير...

عزت بيحب غيرها هو قلبو كبير وبيمطططط ليسع الكل ( ليغرا ) يقبر أمو

أما المخرج يا سيدي ماف ي أروع من هيك .. يضرب الهم ويلي بينهم ..

كل يوم بيجي عموقع التصوير وبيقلن شباااااب عنا كتييييير حلقات شو ما بيخطر ببالكن تفاصيل قولولي ..

ممكن كتير مثلاً تتسمم بديعة بالبوظة وتسهل وتضل 3 حلقات مثلاً وهيي بالتخت والعالم رايحين جايين

عم يشقو عليها ..

بس شو بدك بالحكي غالباً ... أخواننا التراك عندن قدرة مذهلة على الشفاء السريع ..

ممكن كتير عزت أو ضرغام أو أيا بطل يخرطشو فيه بقلب المسلسل شي 290 رصاصة و3 بازوكا

و90 طعنة سكين حادة

وتلاقيه قايم متل القرد بالحلقة يلي بعدها مجبصن أصبعتو ومشنغلها عرقبتو  وعااااادي الحياة حلوة

فمن ميزات  المسلسل التركي أنو مريح جداً ...

باعث للطمأنينة ... كيف عندك الحلقة مثلاً 60 دقيقة ...

عندك 15 دقيقة منن صفن ... وذهول .. وشرود .. وتأمل ..ودهشة ونظرات غير مبررة وتحديق إلى الفضاء اللامتناهي ..

و15 دقيقة ذكريااااااات ... ومراجعة للحلقات السابقة ... وممكن كتير تنعاد الذكرى أكتر من مرة

مشان اذا سمعولك المسلسل بالأخير تكون باصمو بصم ..

و15 دقيقة أحاديث بلا طعمة مالا علاقة بالمسلسل .. وتفاصيل وعلاك ومشاهد مالها داعي ..

عالم عم تاكل عالم نايمة عالم عم تشرب قهوة عالم عم يتفرجو عالتلفزيون ...

يعني الله يعطيهن العافية والله مجاهدين وكلو في سبيل ايصال الملل القاتل للمشاهد العربي ..

يعني قليلة لكن هي كل الممثلات يحملو عوشن ماكياج فول أوبشن أكتر من 800 ساعة تصوير ؟

ولا يضلو بكعب 9 و12 حتى وهنن نايمين ؟؟

بس عنجد شو بدك بالحكي ايمك عن كلل شي ..

عندك بكل حلقة 5 دقايق كاملين أحداث .. مليانين أحداث .. يعني مش حتقدر تغمض عينيك

بس أكيد ما بدنا ننسى ال 10 دقايق المقطوشة من المسلسل يعني لا تواخذونا لدواعي المحافظة على أخلاق الشباب العربي

( كلها بوس )

بس هو عادي يعني المسلسل كلو مبهج ما شاء الله كلو لحم لحم .. وين ماب تجي عينك بتلاقي لحم

بتطلع هون بتلاقي فخاد بتطلع هنيك بتلاقي ........ بس يعني ما شاء الله عليهن عاملين الواجب .. حاذفين البوس ...

كمان على فكرة المسلسل بيساعدك تكتشف ذكائك ومستوى انتباهك ..

ممكن كتير أنت مثلاً تشوف فوزية لابسة فستان أحمر بلقطة من اللقطات

بعد شوي يصير أخضر بعدين تركواز وهكذا ..

ممكن كتير فجأة تطلع على عزت تلاقيه صار أشقر ... لعما ؟؟

والله لا تواخذنا غيرنا الممثل ( خلافات مادية )

أو ممكن ما تعود تشوف الخدامة هايدي ... وهي اسمها ظاهرة اختفاء الممثلين غير المبررة ..

مثلاً كنت تشوفها لهل ممثلة الحبابة هايدي كل يوم

بعدين خفت خفت .. لحتى اختفت ..

وما في داعي للتبرير يعني خلص الممثلة ملت وتركت المسلسل عادي خليك كوووووول

ومن أهم مميزات المسلسلات التركية .. أنو كللللل الأبطال مشهورين

وبيطلعو بالتلفزيون وبالمجلات والصحف الرسمية وغير الرسمية وبالراديو وبتلحقهن الصحافة وين ماكانو ..

مثلاً متل الخبر السابق تبع ( اسهال بديعة ) ممكن أما وأختا وعما وجيرانن يدرو فيها من التلفزيون بخبر عاجل ..

لأنو هاد شي عادي ....يا أخي الدنيا صغيرة وما بيتخبا فيها شي !

بس كلو كوم وكاتب المسلسل كوم تاني ...

عندو حالة متقدمة من السادية المزمنة يعني اذا ما مات البطل ولا البطلة بالمسلسل

بيحكو بدنو وبصير بدو ابرة مهدئ

ما بيهنالو عيش غير ليشوف دم .. ما عندو يما ارحميني

عندو كريزة من النهايات السعيدة ..

بس بيحب أحياناً يعمل المسلسل ( مدينة أفلاطون ) يعني مثلاً الحماية والكنة ييي انشاء الله ما يبلو شو حلوين وبيحبو بعض

الكنة بتناديلها ماما والحماية بتناديلها يا بنتي

والأب ماب يحسن الا يمجق ولادو قبل ما ينامو

والرومنسية وااااو طاااغية عالجميع

كلن أغنيا وعايشين بقصور وفيلات عالبحر .. البطل فيهن اذا شرت مخطتو بيشتروها بمليون ليرة

يعني كل المسلسل شحنات ايجابية ماشاء الله يعني ما بتساعد بنوب على تعزيز حالات القهر والاحساس بالطفر المزمن

واضافة إلى كل هاد بتلاقي بالمجتمع التركي حالة شيزوفيرنيا متقدمة

تظهر بوضوح لما بتلاقي بالمسلسل مثلاً من أول حلقة لآخر حلقة واحد عم يلحق أختو الحامل من حبيبها مشان يشطف عارو ويسلخ جلدا

بس بكل بساطة بتطلع عمسلسل تاني بتلاقي الأخ بنفس الحالة ياااااي شو كووول عم يعانق أختو بعد ماخبرتو أنو هيي حامل وفرحان وعم يباركلا ... ( ياااااااي صرت خااااااال )!!

بس يا أخي شو بدك بالحكي .. ملللليان عبر وحكم ...

شغلة والله شغلة هالمسلسل التركي .. ما بتخلص من عبرة الا لتكتشف عبرة تانية ...

أفكار عميقة وهادفة يعني ما بتقدر تفهم الحلقة من مرة وحدة لازم تعيدها حتى تكتشف العبرة ...

يعني مفيد على كل الأصعدة ..

معنوياً بنشر الأحلام الوردية في قلب كل فتاة عربية

ومادياً واقتصادياً بعرض كااااامل ما تيسر من الأواعي التركية

ابتداءً من اللانجري انتهاءً بالطقوم الرسمية والرياضية ..

وشو بدي أحكيلك لأحكيلك ..

بس عنجد .. لسا عندك فضول تتابع مسلسل تركي ؟

مدري ليش

أنا عندي !!!

ما تواخذونا عالألفاظ العامية ..

سلامي لكل قراء سيريا نيوز يلي بيعرفوني ويلي ما بيعرفوني