من منا لا يحلم بحفل زفاف أسطوري ومن منا لا يحلم ببناء مملكته الزوجية
إذا وقع أحدنا بالحب فكيف سيتقدم إلى خطوة الخطوبة هل بإمكان شبابنا تأسيس عائلة متكاملة إذا كان رب الأسرة لا يستطيع تأمينها وهل تدني مستوى المعيشة هو السبب في رفع نسب العنوسة !!! تساؤلات طرحها عقلي وأجاب عليها الشارع السوري في دمشق .....
وتراوحت الأسباب بين صعوبة تأمين المنزل ولقمة العيش والأوضاع المادية القاسية ولكل سببه أبعده عن فكرة الإرتباط الحقيقي
عمار { 25سنة } خريج أدب انكليزي أخبرني بعد تنهيدة عميقة قائلا : البنت يلي حبيتها ما سترجيت أطلبها من أهلها وعشو بدي أخطبها الحب وحده ما بكفي متطلبات الزواج عالية أو يمكن عادية بس أنا مو قادر أمنها رغم عملي ليل نهار مو قادر أمن حق مازوت يعني بكرة إذا بردت بدفيها بحناني ؟؟؟؟ بتوقع أنو الزواج صار حلم أي شاب أسس نفسه بنفسه مشان هيك أخي هادي خليها بالقلب تجرح ولا تطلع لبرى وتفضح
أما جميل{ 33 سنة } الذي مازال يبحث عن العمل فقد تخلى عن هذه الفكرة نهائيا
الخطبة والعرس وهل قصص شلتها من بالي من زمان وقطعت هل مرحلة أساسا إذا موقادر عيش حالي ليش أهرم بنات الحلال معي إذا لهلق مو ملاقي شغل متل العالم وإذا لقيت يادوب يكفو مصروفي ياسيدي خليني هيك الحمد الله أحسن شي
إلا أن وضع رياض{ 28 سنة } محاسب مختلفاً قليلا فهو أقدم على الخطوة الأولى ولكن بانتظار الفرج ليقدم على خطوته الثانية .......
أنا خاطب الحمد الله ومن سنتين كمان أما بالنسبة لخطوة الزواج فهي شايفها مطولة عأساس قدمنا عبيوت الشباب وبسنتين منستلم البيت هي صرلنا ثلاث سنين مقدمين ولهلق ما طلعت أساسات البناء رغم أنه أهل الخطيبة عم ينقوا فوق راسي مشان أقدم عل خطوة التانية بس شايفلك حالي لح أفكس الخطبة وخليني لحالي بلا حب بلا مشاعر أوضاعنا بتبكي وأنت بتقلي حب
وهناك من وجد حلول لهذه المشكلة وبانتظار التنفيذ فقط
محمد علي{ 38 سنة } موظف
يا رب تشتي عرسان لك كانت هي الغنية للبنات بس بوقتنا صايرة موضة شبابية الله وكيلك ومشان أزمة العرس أنا بشوف أنو المرأة أخدت حقوقها إلا حق واحد لازم تاخده هو أن تتقدم لخطبة الشاب لك أي مو بقلك المتل خطوب لبنتك أبل ما تخطب لأبنك هو مو هيك بقول بس هيك لح يصير المتل وهيك بتقل نسبة العنوسة ...الله وكيلك الشباب عم يخافوا يخطبوا رغم أنه في بنات بتوافق على وضعن بس بخافوا من الرفض أو يسمعوا كلمة لأ بقا الغالبية ما لح يقدموا عل خطوة من أساسها بس إذا تنفذ مشروعي بيمشي الحال
لكن{ جهاد 23 سنة } وجد السفر هو الحل الوحيد لإنهاء مخاوفه من تأسيس عائلة متكاملة
دورت كتيير وشتغلت كتيير بس كان الشغل يغطي مصروفي مو أكتر وأنا أهلي قدراتهن المادية ضعيفة وصعب كتيير أسكن معهن إذا تجوزت مشان هيك مفروض عليّ أمن حق بيت وهون صعب كتيير ما في غير الغربة الحل الوحيد وبعدين ببلش فكر إذا ممكن حب وأخطب ولا لأ
ومن جهة أخرى ومع شباب من طبقة اجتماعية راقية كان آخر همهم هو ما يفكر به الشباب أبناء عمرهم
هاني { 24 سنة } هندسة ديكور أنا من جهتي ما لي آكل هم قصة البيت والعرس وتكاليف أبي الله يديمو متكفل بهل قصص وناوي بس أتخرج هل السنة أفتح مكتب هندسي يعني لتطوير عملي وفكرة الزواج مو مشكلة بس لاقي بنت مناسبة دغري لح أقدم عليها
إلا أن كنان{ 26 سنة } وعندما سألته عن عمله أجاب : شغل شغل شو يا رجل أنا بحاجة شغل!!!
ما بحب أتعب حالي ومشان شو مشان بالآخر أتجوز وأصرف شقا عمري عبنت !!!
يا سيدي و وإذا كان ولا بد وحبيت أرطبت فالبيت جاهز والعرس بأحسن صالة بالشام بقا ليش آكل هم بابا مو منقص علي شي أبدا وأنا مرتاح كتيير بعدين يا هادي لاقيلك شي موضوع عليه القيمة وتكتب عنه هاد الحكي آخر همي .....
تراوحت الآراء والحلول وأختلفت المشاكل الشبابية باختلاف طبقات المجتمع ولكني كتبت هذا المقال لأتوصل للسؤال هل الشاب الذي يأسس نفسه بنفسه نفته الأوضاع المادية الصعبة وهل كلمة عصامي أصبحت شوكة قاسية في حلق شبابنا والذي لم يولد بفمه ملعقة من ذهب فكيف له تأمين مستلزمات عش الزوجية ؟؟؟؟
فإذا وجد جواب لأسألتي ممكن أن ننهي مشكلة العنوسة ... ودمتم سالمين
أمير سيريانيوز الغالي هادي...مقالة واقعية ومن صلب مجتمعنا،الله يعين الشباب يللي بدهم يتقدموا للزواج ويا رب يهدي أهل البنات ويدب بقلوبهم الرحمة والشفقة على هالشباب المساكين ويحلوا عنهم ويخففوا من طلباتهم شوي!!...تحياتي لك أيها الرائع عذراً على التأخير واسمح لي مرر عبر صفحتك تحية كبيرة كتير للصديق العزيز إياد الدرويش،وسلام خاص من ماما أم عبدالله ألك وأله...بانتظار جديدك.
مساهمة حلوة وواقعية كتير ضحكني رأي اللي قال يارب تشتي عرسان ومابقي غير البنت تطلب عرسان ..مابعرف شو بدي قول ؟؟بزعل وقت شوف شب وصل لعمر كبيرة ولسه ماقادر يتزوج للحالة المادية طبعا البنت الها ظروف لازم تشوف المناسب لعقليتها واوضاعها وتتفاهم معه اما الشب بيقدر يختار اللي بدو اياها وماقادر يقدم على خطوة .انشالله تنحل ظروف الكل يارب .للاسف المال هو عصب الحياة
سالي سيسو الغالية كتييير شتأتلك سألت جدي مرة كيف تجوز وطلب أيد ستي قام قلي علحصيرة وهاد بأكد حكياتك شكرا سيسو وشكرا لمرورك نورتي صفحتي/ أختي الغالية والكاتبة المتألقة جهان علي وأنا بأيد كلامك بس في كتير من الشباب بيرفضو زوجاتهن يصرفو عل بيت وفي شباب بشوفوها مشاركة وبالنهاية أنا بشوف عمل المرأة ضروري شكرا ألك اختي جهان ولمرورك / محمد الشوا شكرا لمرورك ياغالي والغتكال على الله هو من أساسيات التوفيق بالعمل واسعى ياعبدي لأسعى معك شكرا أبو حميد مروك كتببر بيسعدني
طرطوسية الكاتبة المبدعة شكرا لرأيك مرورك/ ندى وهبة الغاليرة بتشكرك كتير وبفتخر أكتر وقت شوف أسمك عمساهمتي بشكرك من ألبي وعم أستنى كتاباتك / الغالي جدا أستاذي غياد درويش شكرا لكلامك واسفائدك لألي بس كنت مطر أنقطع فترة عن الموقع بداعي السفر وسلامك وصل ياغلي وهنن بسلمو عليك تحياتي يا غالي/ الكتبة المتألقة دوما مي طريقة تفكيرك كتيير عجبتني وياريت نص البنات فكرت متلك أكيد كنا قصثصنا جناح العذوبية شكرا لمرورك نورتي صفحي
وأعتذر عن الإنقطاع المسبق إلا أنني لم أنسى أسرتي ولن أنسى أصدقائي ودايما أفكر فيكم إلا أن مشاغل الحياة سرقتني قليلا وشكرا لكل من مر على صفحاتي
المشكلة كامنة في نفوس هذا الجيل الذي لا يرضى بالقليل ولا يقنع بما عنده ،ولا يرضى بواقع معين ،فمثلا موضوع السكن :لماذا لاترضى الفتاة مثلا بالسكن في بيت أهل زوجها؟ فلتعتبرهم أهلها مثلا ولتعتاد على طريقة عيشهم أليس ذلك أفضل من البقاء عانساً،وبالنسبة لمصاريف الزواج فكلها يمكن اختصارها الى القليل وذلك بتيسيرالأهل ورضى الطرفين أما مصاريف بعد الزواج فيمكن اختصارها ايضا وذلك بصرف الضروري جدا على المعيشة ،التقشف في المعيشة هو الحل لأزمة الزواج،صدقوني لقد عاش أجدادنا هكذا،الحكاية بدها رضاوقناعة .
صباح الخير عزيزي هادي مساهمة واقعية و طرح جيد و الحقيقة ان عمل المراة اصبح ضرورة في هذه الايام الصعبة كي يتشارك الزوجان في تحمل مصاريف الحياة الباهظة و انا لست مع الراي القائل بان عمل المراة هو الذي اعاق عمل الرجل فالرجل الذي يعمل هو ايضا غير قادر على تحمل مصاريف الحياة وحده و بالتالي لابد من المشاركة في العمل و في البيت ايضا حتى لا تتحمل المراة جهدا مضاعفا , تحياتي لك اخي هادي و الى مزيد من التالق و فقك الله
لا تعشق من تحب فلا بد يوما من فراق... ولا تتعلق بالأصدقاآآء لانهم دائما على رحيل.. فكلماآآ عشقت من أحببت اسأله عن موعد الفراق وكلما ضحكت تذكر ساآآعة البكاآآء وعندما تبكي لا تبكي على حب مضى... بل ابكي على حب آت..!
انا شاب في مقتبل العمر حسن الهيئة ذو شهادة جامعية لا املك الفرنك, احسن الطبخ والنفخ و اسمع الكلمة و احب الأطفال , اي فتاة اعجبت فيي يمكنها أن تطلبني من بيت أهلي, اشترط أن تمتلك الفتاة بيتا و عملا محترما وسيارة موديل 2011 و الشكل غير مهم المهم السترة
مبروك عليهن الوظيفة والراتب والعنوسة ومبروك علينا المرمطة والبطالة والعزوبية
عزيزي هادي مقالة جميلة ومعبرة عن مشاكل الشباب ومثلهم الكثيرين .. لكن ما المانع أن نتكل على الله الكريم والمعطي والغني وندعوه في جوف الليل وآناء النهار بالهدى والتقى والعفاف والغنى .. أسأل الله أن يفتح عليك باب الرزق وعلى جميع شبابنا
هاي هادي انت مواضيعك بتجنن وطرحك رائع انا بدي قلك عم تحكي واقع بس لا تنسا انو في شباب اهلا مأمنينلا كلشي وما عندا مشكلة اما في شباب اهلا بلاساس ما عندن شي ويا دوب عايشين وعم ياكلو وفي شغلة اساسية انو الوضع الاقتصادي هلئ زفت كلشي غالي البيوت وكلشي مو متل ايام ستي وستك يتجوزو ببساطة وشكرا سيسو
المبدع هادي .. شكرا لك على طرح هالموضوع الهام .. برأيي حتى لو التقينا بالانسان المناسب ويلي يفترض انو مانفرط فيه لازم كمان نكون منطقيين الانسان كيف بدو يتزوج ويكون مسؤول عن بيت وهو مو قادر على هالشي ماديا المعاناة حتكون أصعب من عزوبيته ، يعني إذا ما قدر يملك بيت لازم يكون راتبه بيأهله يستأجر والا ما اله غير بيت أهله اذا الطرف الثاني ما عنده مشكلة .. هاد حال أغلب الشباب ..
حبيب القلب الغالي هادي : أول شي اشتقتلك وين هالغيبة مو بالعادة تغيب هالقد إن شالله خير , الموضوع اللي طرحتو بأسلوبك الشيق الجميل متل العادة مميز بس معقد كتير وشائك حقيقة مافي تنين بيختلفوا على أنو الشب صار يعد للألف وقت يقرر يرتبط لكتير عوامل بس بالنهاية إذا توفر الوعي والحكمة من الطرفين ممكن يتغلبوا ع كتير شغلات ومصاعب والحكي بيطول .... سلامي الحار وتحياتي العطرة لك وللغالية أسماء والسيدة المحترمة أم عبد الله بتمنى من ربي تبقوا بخير وصحة وسعادة
ليش العالم عندا شي تاكلوا ت حتى تتجوز وتجيب ناس ياكلوا معا؟؟؟ وغير هيك الولادة وما بعد الولادة وتكاليف الاطفال وما ادراكم ماتكاليف الاطفال.... يعني بحسبة بسيطة اذا افترضنا انو الواحد اتجوز ببيت ملك وكان موفي كل ديونو ومصاريف جواز (طبعا هالحكي هاد مستحيل بس عم نحكي فرضيات) فحسب الاسعار الرائجة, التكلفة اليومية الوسطية للاكل والشرب وضيافة للزوار حوالي 300 ليرة كحد ادنى, وبعدنا ماحسبنا هداياالواجبات واللباس والمرض وفواتير الكهربا ومواصلات..!! اذن الزواج للناس العاديين والموظفيين مستحيل؟؟
أول شي بدي قلك شكرا عالطرح الرائع ، تاني شي هي المشكلة متل ما اتفضلت متفاوتة حسب الطبقة اللي بينتمي إلها الشخص يعني اللي خلقان بتمو معلقة دهب مو متل اللي مو ملاقي ياكل ، و أنا برأيي لازم الشب يكون حالو بحالو و بعدين ياخد بنت الحلال و ما حدا بياخد غير نصيبو و بالوقت اللي رب العالمين كاتبلو ياه ، شكراً أخي هادي .. مواضيعك حلوة و مميزة
يعني انطلقت البنات بحرية وزاحمن الشباب على الوظائف والشغل فألف مبروك الهن خليهن يفتحن بيوت وينبسطن مبروك عليهن الوظيفة والراتب والعنوسة ومبروك علينا المرمطة والبطالة والعزوبية ومبروك عالجميع المساواة بين الجنسين فها نحن لحقنا الغرب بالمساواة بقي علينا نلحقوا بنتائج المساواة اللي مابتخفى على احد مثل العزوبية والمساكنة والانفلات الجنسي و...
لا أستغرب أن يصبح الجميع إما رهباناً وراهبات عكفوا عن الزواج أو فاسقين وفاسقات اختاروا المساكنة.. هذا ما سنصل إليه إذا استمر الحال هكذا.. والله يستر... شكراً هادي
أسماء يا شمعة أنارت السماء أسمك أنار صفحاتي وكلماتك دخلت قلبي بلا أذن ولا أسأذان الله لا يحرمني منك ويخليلي ياكي يا حق يا أميرة سيريا نيوز / مدام جهينة هلق حسيت أنه المقال كمل بتعليقك وبتعليق سمسوم بلاهن كان المقال بلا معنى شكرا مدام أنت وتد قلبي وسيف قلمي بتشكرك كتييير يا غالية وأنا وأسماء كتييير شتأنالك