شغلة بتحط العقل بالكف..

جلس على كرسي في حديقة عامة، هرب من المنزل ومن مشاكله مع زوجته، يهرب إلى هذا المكان كلما شعر بالاستياء من أمر ما، يتأمل وجوه الناس ويبحث عن السعادة التي فقدها منذ زمن بعيد.. وفجأة..

يجلس بجواره رجل عجوز يحمل بيده (جريدة)، يرمي عليه سلاماً بارداً ثم يقرأ في جريدته .. شعر الشاب بسماجة هذا العجوز وبسوء اختياره للكرسي، وحاول صم آذانه عما كان يقوله ذلك العجوز، والذي لم يكن أصلاً ليفهمه قبل أن يفرضه عليه حين خاطبه قائلاً..

العجوز: برأيك إذا أربع ملوك تنافسوا، مين بيربح لك إبني؟

الشاب: عفواً..

ينظر العجوز في جريدته لثوان ثم يعود ويخاطب الشاب مجدداً: عنا أربع ملوك وأربع ممالك صغيرة، كل ملك لازم يلتزم بخمس أشياء لحتى يفوز بالتاج، كل ملك إلو حقوق وعليه واجبات..

الشاب: ما بهمني الموضوع والله يا عم..

العجوز: أوف.. لكن ليش إنت هون بالحديقة؟

الشاب: تخانئت مع مرتي لإنها بتحكي متلك، مواضيع تافهة وأشياء بلا طعمة، قمت اجيت لهون..

العجوز: معناها ركز معي شوي.. (وينظر إلى جريدته)..

ينظر إليه الشاب ولسان حاله يقول: ليش ما بقوم بروح على شي كرسي وبتركو هون لحالو وبخلص من غلاظتو..

العجوز: كل ملك رح يحكم لفترة وبقية الملوك رح ينفذوا اختباراتو مع إنو مصلحتن بتقتضي إنو يعترضوا على كل شغلة بيعملها..

خمس أشياء بيساويها هاد الملك وعليها بياخد علاماتو والنتيجة النهائية بتكون ع الشكل التالي: صاحب أكبر علامة رح يصير ملك الملوك، وصاحب تاني أكبر علامة رح يصير وزيرو، التالت رح يصير موظف، والرابع مواطن عادي..

الشاب: اي..

العجوز: اختبار العلاقات غير الشرعية مع النسوان .. كل علاقة غير شرعية بيعملها الملك رح تقلل من علاماتو مع العلم إنو بقية الملوك رح يحاولوا توريطو بهي العلاقات، واختبار مادي .. لازم ينتبه منو لإنو كل دينار بيحصل عليه هاد الملك رح ياخد من علاماتو كمان، الاختبار العسكري .. رح يكون على شكل معارك صغيرة وكل ضحية بتوقع على أرض هالملك رح تنقص من علاماتو أكتر وأكتر، أما اختبار صحة المواطن .. فرح يكون على عجوز .. ولازم الملك ينتبه ويمنع وقوع هاد العجوز على أرضو مشان ما يخسر كمية كبيرة من علاماتو نظراً لأهمية هاد الاختبار واللي بيتعلق بالصحة العامة، هلأ كل هديك الاختبارات بكفة وهاد الاختبار بكفة .. تشكيل الحكومة .. لأنو هاد الاختبار بيعدل وبيزيد العلامات بس طبعاً لا تنسى إنو الملوك التانيين رح يشكلوا حكوماتون بنفس الوقت واللي بيخلص أول شي وبيوزع كل رجالو على مناصبون رح ياخد العلامة التامة..

الشاب: وكيف بدو يكون ترتيب هالاختبارات ومين أول ملك رح يبدا؟

العجوز: اممممم .. الملوك رح تتنافس بنفس الوقت بس الفرق إنو واحد منن بس رح يكون صاحب توقيت الاختبار اللي بيناسبو حسب مصلحتو .. يعني لما بيلاقي حالو مستعد لتشكيل الحكومة أو للاختبار العسكري أو للمادي أو لاختبار العلاقات غير الشرعية أو صحة المواطن .. مع إنو أحياناً بيضطر هاد الملك للدخول باختبار وبيكتشف بعدين إنو هو أول واحد فشل فيه لإنو ملك تاني مجهز حالو لها الاختبار أكتر منو.. أما بالنسبة لترتيب فترات الملوك فهي بتم بالقرعة وأول ملك بس يخلص الاختبارات الخمسة ويتقاسم العلامات مع الملوك التانيين .. بيسلم المملكة للملك اللي بعدو مباشرة..

الشاب: وايمتى بتخلص القصة؟

العجوز: وقت يخلص الملك الأخير من آخر اختبار..

الشاب: وبركي واحد من هالملوك حس حالو مو قد الاختبارات وبطّل هالشغلة..

العجوز: بتسقط عنو فوراً كلمة ملك وبيصير مواطن عادي.

الشاب: وبركي تعادل ملكين بالعلامات؟

ينظر إليه العجوز مستغرباً وينظر في جريدته ثم يجيبه مبتسماً: لأ ما بيصير ملكين يتعادلوا وإذا تعادلوا بيتفقوا على اختبار إجباري وغالباً بيكون اختبار صحة المواطن..

الشاب: طيب يا عمي ليش عم تسألني مين برأيي بيربح بهيك اختبارات طالما انت بتعرف إنو صاحب العلامات هو اللي رح يربح؟

العجوز: قبل ما يكون سؤالي مين اللي بيربح، سؤالي مين هو يلي رح ياخد أكبر عدد من العلامات؟

الشاب: طبعاً الملك يلي رح ياخد أكبر عدد من العلامات هو الملك يلي اختار التوقيت الصح لاختباراتو وحالفو الحظ باختبارات غيرو؟

يحتد العجوز: ولك أنا هاد يلي رح يجنني .. صرلي عشرين سنة بلعب شدة .. وصرت ملك بلعبة التريكس وبالجريدة عم يقول برجي إنو يوم سعدي التلاتا وما ربحت مبارح وطلعت الطشي، وأول مبارح كنت اللئلوء .. بربك مو شغلة بتحط العقل بالكف؟

ينظر إليه الشاب مندهشاً ويقول: بالله جد .. هلأ صرلك ساعة عم تاخدني وتجيبني وتعملي اختبارات وملوك وممالك ونسوان وصحة وحكومة وآخر شي بتقلي .. شدة وتريكس .. ولك إي إي  شغلة بتحط العقل بالكف وأنا يلي بستاهل مية كف لإني سمعتك يا عم..

وينصرف الشاب متمتماً مع نفسه بينما ينظر العجوز إليك عزيزي القارئ ويقول: شبو هيك جن؟ الله يثبت علينا العقل والدين؟ بس بربكون .. مو شغلة بتحط العقل بالكف؟

.............................

.............................

ملاحظة هامة: سيفهم هذه القصة من يعرفون لعبة التريكس، أما من لا يعرفها فعذراً..