الحلقة الثالثة من مسلسل الفيس بوك الكوميدي :

الانثى مجاوبة على شرح المستثمر لكلمة عنيد تقول :

كنت عم امزح معك بس انا ما بحب العند وبحب النقاش والموضوعية(تقبري قلبي انت كمان ما عرفتك)

المستثمر سارحا بفكرة انه مناقش من الدرجة الاولى يقول :

ولا انا ما بحب العند ولا فيني اتناقش مع عنيد (اي اسرح اسرح لهيك اليوم كانت صواتك معبية البناية في نقاش مع اخواتك)

تستطرد الانثى هنا قالبة الحديث رأسا على عقب وهي تتهضمن قائلة :

اصلا انتو الرجال عنيدين ولا بتناقشو حدا (اي على اساس الانثى كتير بتتناقش)(بعض الاناث مشان الله لا تفهمونا غلط)

هنا يقوم المستثمر بعصر دماغه الثمين مستخدماً لغة التخصيص قائلا:

مو كل اصابعك متل بعضا والله انا كتير متفهم وبحس حالي غير كل الشباب (يا لئيم.... متل لقلك متل ..على اساس انو الله خلقك وكسر القالب)

الانثى مستخدمة اسلوب الاستفزاز الانثوي ببرائة ترد قائلة:

اصلا انتو كلكون بتحكو هيك وبس تحز المحزوزة وتتعلق فيكون البنت بتقلبو 360 درجة(اي فهمانة الواقع يا قلبي وكاشفة الكل)

كبرت براس الذكر وبدو يوصل فكرة انو هوي من الملائكة ومدري شو عامل لنزل عالارض فيقول بنباهة :

ما قلتلك مو كل اصابعك متل بعضون حرام تظلميني انا مو هيك (على اساس زعل ومظلوم ..لك اللي في شوكة بتنخزو)

وهنا بهضمنة انثوية معروفة ضاربة اقوالها عبر الحائط تقول :

شو زعلت والله ما كان قصدي بس كنت عم احكي بشكل عام (باعتبار الجنس اللطيف ما بزعل حدا )

هنا الذكر يرفع رأسه راسما ضحكة على وجهه ممدود اللسان وهو يقول بنفسه علقت واعتذرت فيقول :

لا تعتذري انت ما غلطتي معي عادي والايام رح تثبتلك اني ماني عنيد (كلنا رح ننطرك يا بطل )

فتقوم الانثى بتغيير الموضوع وتسأل المستثمر عن عمله فتقول :

صحي انت شو بتشتغل (ان شالله يكون مدهن مو مشان شي بس مشان وحدات الموبايل)

يرفع المستثمر عينيه واضعا يده على رأسه يفكر في عملا رفيع يشد الانثى وبعد تفكير عميق يقول :

والله بعد ما تخرجت ما توظفت انا ما بحب الوظيفة بحب العمل الخاص عملت مشروع صغير واشتريت محل فتحتو موبايلات وعم اشتغل محاسب بشركة خاصة (برابو يا بطل اجيت قص لزق على طلباتها اتحمل يا جحش تفضل)

الانثى وهي تعزف موسيقا النصر ضاحكة العينين تقول على سبيل الدعابة :

اي برابو يعني صارو وحداتي ببلاش ههههههه عم امزح لا تصدق (اي عم تمزحي لا تحلفي ما صدقتك)

يرفع المستثمر صدره للاعلى ضاربا يده على صدره وهو يقول في نفسه يا باطل فيقول :

ولو المحل وصاحب المحل والوحدات على حسابك تكرم عيونك (مععععي يا روحي مععععي انبسط صرت خاروف)

فترد الانثى ردا دبلوماسيا وتقول :

الله يكرمك بس انا كنت عم امزح اصلا انا معي خط (ولي مصاري مو وحدات)

المستثمر مستمرا في حالته الخاروفية مصدرا صوت الخاروف قائلا:

انا ما عم امزح ولو غالي والطلب رخيص اصلا انا كريم وما بحب البخل (بدي افهم انت خاروف ولا قطيع خواريف)

الانثى ساحبة في فكرة المستثمر قائلة :

والله ما في اكره من البخيل ...والله البخيل ما بينحب (وهي امنا الاركيلة كمان)

هنا يحس المستثمر بأنه فتح باب عليه سيجعله يتخورف فيحاول تغيير الموضوع قائلا :

وانت شو بتشتغلي مع اني بكره البنت تشتغل (لك يا فدان اسألا شو بتشتغل ضروري تقلا ما بتحب البنت تشتغل لحق هلا على صراع )

الانثى كما توقعت ترد وتقول :

ليش بالله ما تشتغل شو بس انتو بتشتغلو وبتتسلو ولا نحنا لازم نخدم فيكون وبس(شو هاد يااا.. فكر متخلف)

هنا يحس المستثمر انو غلط وفتح باب عليه اصلا ما بيعرف ليش فتحو فيقول :

لاه الله يسامحك مو هيك قصدي ...قصدي انو البنت لازم تتستت وكل شي بيوصل لعندا (ولك شو عم تعمل يا روحي انت جنيت )

الانثى تكتسب بهذه الحاله وهذا الرد لغة الدلال وتقول:

اذا هيك مو مشكلة فكرتك من هدول المتخلفين ....(تفضل يا فهمان لحق اذا فيك تلحق )

فيضرب المستثمر على رأسه وهو يدرك هذا الباب اللي فتحو على حالو ويقرر ان يلف الموضوع فيسأل الانثى:

شو بيعنيلك الحب (هههه لك تلحس داني شو فهمان ...)

الى اللقاء مع الحلقة الرابعة من مسلسل الفيسبوك الكوميدي:

الممثلين حسب الظهور :

المستثمر الذكر

الانثى

الخاروف :وهو حيوان اليف تطلق على بعض الناس اللي بمععععو وفمهكون كفاية

سيناريو واخراج :سموأل ملحم