كتير صعب عليي أوصف شعوري اليوم وأنا نازل من السيارة وبيدي جرة غاز مليانة  فعلاً شعور لا يوصف، شعور المنتصر، شعور رجعني لأمجاد حرب تشرين.

ما بتروح من بالي نظرة الجيران اللي انقسموا بين حاسدين وبين فرحانين لي من قلبهم. ما عم أقدر أنسى لمّة أهل الحارة حواليي وعم يهنّوني وكأني حامل بإيدي شهادة الدكتوراه من باريس. آااااه على منظر الوالدة وقت شافتني حامل الجرة... غرغرت الدمعه بعينها وقالت لي: الله يرضى عليك يا ابني وعقبال الفرحة الكبيرة وقت منعبي مازوت.....