عرس الطّبيعة شمس الرّبيع كتير طمّيعة تفرض على الغيمات تقليعة

وْ ترسمْ بريشِه مْعبّقة بِعطورْ ورد وْ نِدي و طْيور و زْريعة

و عصفور تا يحيي عرس للنّور عم يعزف مْن الرّوح تقطيعة

وْ أيّا نغم رح يعزف العصفور لَو كانت الأزهار سمّيعة

 و شجْره لْ عَلَيها الزّهر و المنتور فستان عرس بْيَوم توديعة  

من لحن نسمِة عا وتر مسحور عِمْلِتْ من الرّقصات تنويعة

و ما شبْعتْ بهاللّيل هزّ خصور تَ اسْتحلتْ النّجماتْ تطليعة  

و لمّا بيجي أيلول بكرى يْزور لا تزعلوا لَو شلْحت الفستان وْ لبسِتْ بِلَيلةْ أنس تفريعة