نزلت مطر ع الدم والحاوي كان تراب
نزلت ع امي اللي ماتت من عطشها وما أرتوت
لكن بدمها شرّبت التراب
...
نقطة مطر فوق اللي ماتو
واللي عاشو واللي بعدون ناطرين
فوق اللي لسى مهددين
مهجرين
مشردين
فوق اللي قتلو واللي كفرو
وفوق اللي بصلاتهن صرّخوا
يارب من عندك فرج ياربي أمين
ياأهلي
يابعاد عن عيني أنا
مين باقي منكم مين؟؟
حبة مطر يعني حنيّة
وانا قاتلني الحنين
شو إشتقت ارجع حامل بكفي مطر
مررها فوق جبين
إنزل على وجهكم مطر ياأمة الياسمين
ياريت لو نرجع
ياريت نتجمّع
ياريت لو يعرف حدا منّا
يسكّت المدفع
ياريت نقدر نوقف زناد القتل
ومانكبس الإصبع
ياريت فينا نداوي الجرح من قطعة السكين
حاجة قتل
صارت شوارعنا طفل مرمي بشوارعنا
مدبوح ومقطّع
مخزّء مخردء معلّق
مقتول بإسم الدين
ياريت فينا نتعلم من الدم
ياريت فينا نشم
من ريحة الشهدا ريحة الياسمين
ياأمة الياسمين
افتحو قلوبكم وشوفو فوق مد البصر
يلي قال الله إنتصر
يلي قال بلدي إنتصر
يلي قال سوري إنتصر
يلي مد إيدو وصافح ترابه إنتصر
تعانقو
كرمال الله تعانقو وأنجبلو متل الطين
ياأمة الياسمين كونو كما الياسمين
تسلم حروفك وفكرك استاذي والله حرام يلي عم يصير بشوارع الشام الله يردها النا الرد الجميل ويردنا النا نحنا الها اشتقالها واشتاقتلنا ..ديدي