كان يا ما كان بحديث الزمان، لك أي ما تستغربو!!! بحديث الزمان، وكمان هل مرة بدي احكي ويلي ما بدو يسمع، والله بنصحو نصيحة يروح ينام، يعني بدي ضل احكي هل حكاوي طول ما عم عاني، يا سادة يا كرام أحياناً نحنا بني البشر منحب نعمل شي جديد بحياتنا لنقضي شوي على هل روتين يلي عم نعيشو فكيف إذا كان روتين غريب من نوعو، يعني أصوات تفجيرات، وأخبار ما بتسر حدى، وفلان مات ابنو، وفلانة انخطفت بنتها، وفلان خرج ولم يعد، وما منعرف إذا رح يرجع، والله هو وحظو....

المهم حبينا نعمل جو حلو شوي بالشغل فاتفقنا مع كم صبية بتحضير كم شغلة للاحتفال بعيد ميلاد زميلتنا بالشغل، وطبعاً هل تحضيرات أقل شي بدها كاتو، وييييييينك يا كاتو، روح يا ابن الناس جبلنا كاتو مشان نحتفل ونغير شوية جو، والله ابن هل ناس ما كذب خبر وراح لعند أحسن محل وبنص البلد ويااااااااااا ريتو ما راح، يا جماعة ساعة، تنتين، تلاتة وهل زلمة ما كان يرجع، منحكي معو بقلنا والله الطريق مسكر رح جرب طريق تاني وهكذا، وبعد عناء شديد وصل هل كاتو، اجتمعوا الأحبة وضحكو وانبسطو، بسسسسسسسس يا فرحة ما تمت.

خلص الدوام وكل واحد حمل حالو ليرجع علبيتو، الف الحمد لله من على باب الشركة بلشنا نسمع أصوات، هاد غير العجقة والطريق يلي كل خمس دقايق بيفتح لثانية، يعني فيكون تقولو ما عم يفتح، عجقة وزحمة مو طبيعية، لك سيارات عل يمين وعل يسار ومن فوق وتحت كمان!!!!

وهاد عم يزمر وهاد عم يسب وهاد وشو ما عم يتفسر وكأنو الطريق مكتوب باسمو ونحنا متعدين على حقوقو، لك شعب، بربي شعب مافي منو؟؟؟؟

للحظات حسيت إنو مستحيل اوصل على بيتي بهل نهار وخصوصاً لما صرت اسمع اطلاق رصاص قريب كتير، فقلت يبدو هاد آخر يوم الي على أرض الوطن الغالي، بس بعد ما انحرقت اعصابي وصارت حرارتي فوق المية وخمسين مشي السير  ووقف صوت الرصاص، ووصلت على بيتي... وكما يقول المثل الشعبي: "عمر الشئي بئي" وتوتة توتة ما خلصت الحتوتة بس خلص هل جزء وبتوقع يكون في جزء تالت ورابع إذا ما اجتني شي رصاصة أو قذيفة، ياااااااا رب احمي الجميع.

2/10/2012