مساهمات القراء
شعر
لما تشرق شمس نهار ...بقلم : عبد الوهاب شرينهلما تشرق شمس نهار
و بيبلش يولد الظل
شجرتنا بقلب الدار
بيغطي فيا عالكل
و بيعلا صوت شبايك
عم تتفتح حتى تطل
منها وجوه ولاد صغار
و ختيار من النومة مل
عم بيحركش بهالبيت
يسقي الوردة و يسقي الفل
و يبلش صوت عصاقير
و ريحة قهوة عم بتفوح
و الشب الفايق بكير
ناطر بردايتها تلوح
و الحلوة السهرانة كتير
شباكا مالو مفتوح
عم يستناها تتطل
مبارح كانو سهرانين
عم بتقلو بخاف كتير
بكرة تتركني و بتروح
و تقص جناحي و تطير
و ايقى جسم و ما في روح
و روحك تنساني و تمل
يا غيم الجاي من بعيد
بلون الفرحة بلون العيد
كل يوم اللهفة بتزيد
للعصفور و للقرميد
للصبح الحامل تنهيد
بيفيقنا فيل الكل
اوعك تنساني و تفل
2013-05-23
التعليقات
عبد الوهاب
2013-05-28 15:55:05
تصحيح
السيد محمد عصام الحلواني: شكر لتعليقك الرائع هنالك خطأ مطبعي فعلا(بيفيقنا قبل الكل) و شكرا لك مرة ثانية
السيد محمد عصام الحلواني: شكر لتعليقك الرائع هنالك خطأ مطبعي فعلا(بيفيقنا قبل الكل) و شكرا لك مرة ثانية
سوريا
محمد عصام الحلواني
2013-05-23 17:48:09
الأستاذ المحترم .. عبد الوهاب شرينه .
سلسة ورائعة وتنساب كالماء ( لم افهم البيت التالي لعلل هناك خطأ مطبعي .. بيفيقنا فيل الكل )شكرا لك هذه الصور الرائعة .
سلسة ورائعة وتنساب كالماء ( لم افهم البيت التالي لعلل هناك خطأ مطبعي .. بيفيقنا فيل الكل )شكرا لك هذه الصور الرائعة .
سوريا
كلمات ومعاني رائعة ذكرتنا بأسلوب سليمان العيسى سلمت يداك