هاد انا من الناس السوريين يلي عايشين بالخليج صرلي سبع سنين،، وخلال فترة الاحداث ببلدنا تعرفت على كتير ناس سوريين يلي منون اجا خلال الاحداث ومنون موجود هون اصلا.. والشي يلي جمعني انا وهالناس هو غير حبنا للوطن، وغير انو كل واحد مننا عندو غوالي واحباب واهل بالشام،، بس الشي التاني الاهم يلي جمعنا انو معظمنا، لحتى ما قول كلنا، اختلفت اولوياتنا وصارت اهم اولوية عنا انو نقدر نأمن اي مبلغ من رواتبنا لنبعتو لاهلنا بالشام... 

يمكن حتى في كتير مننا مو بس عم يبعتوا رواتبون ع الشام لاهلون ليساعدون، بس كمان بعتو كل شي كانوا مصمدينو بهالغربة،،، هاد طبعا واجبنا تجاه اهلنا وعائلاتنا وبلدنا بس مو هون بيت القصيد

بيت القصيد هو انو ليش سوريين الخليج تحديدا اكتر شي عم يتم انتقادون من اهلنا بسوريا؟ مبارح مثلا عم احكي مع اختي قامت قالتلي بكرا ع راس السنة اانتو بتكونوا سهرانين ومبسوطين ومو سائلين عن حدا ونحنا متل الفيران عم نهرب من تحت القذايف !!  ومن كم يوم رفيقتي كنت عم اتناقش معها قامت قالتلي يا ريت انتو يلي بالخليج بالذات ما تتفلسفوا لانكون عايشين هنيك مبسوطين ونحنا يلي عايشين كل لحظة بلحظتها!!

طبعا انا اكتر من مرة حكيت قدام اهلي انو بدي ارجع ع الشام ونفس الاخت والصديقة يلي عم ينتقدوا السوريين بالخليج،، هنن نفسون قالولي شو بدك تجي تعملي هلء؟ لا في شغل ولا من يحزنون وانتي هنيك عم تساعدينا وتساعدي اهلك بقا لا تكوني انانية بس لانك تعبتي من الغربة بدك ترجعي،، طولي بالك لتخلص الحرب

طيب احترنا يا قرعة،،، يعني بدون يانا ما نحكي باي شي بيتعلق بالبلد لانو ع قولتون نحنا ما بيحقلنا لانو نحنا شو على بالنا قاعدين بالخليج وعم ننظر،،، وبدكون يانا ما ننزل ع البلد لانو ونحنا بالخليج عم نقدر نساعدون ونبعت مصاري،،، بس انو ما لازم نعيش بشكل عادي!! بس ليش سوري الخليج بالذات هو يلي مظلوم هالظلم كلو مع انو اكبر نسبة تحويل اموال للشام عم تجي من سوريين الخليج!! 

يا حسرتي ع المغترب يلي قلبو وحياتو ومالو بيكونوا لاهلو بالشام وهنن بيظلموه بس لانو عايش برا

https://www.facebook.com/you.write.syrianews