عاش ثَعْلَب وزَوْجْتُو بِغابة من الْغابات. كانوا مبسوطين كْتير. كانوا يِتْصَرَّفوا كَأَنُّون مالْكين الْغابة. بْيُوم من الْأَيّام فات أَسَد عَالغابة. زَوْجةْ الثَّعْلَب خافِت وراحِت لَعَنْد زَوجا وقالِت لُو:

زَوجةْ الثَّعْلَب: الْأَسَد إجا لَغابِتْنا. أَنا شِفْتُو الْيُوم وخايْفة كْتير.

الثَّعْلَب : ولِيش خايْفة. الْغابة غابِتْنا ومِلِكْنا (مُلْك). وعَنْدنا سَنَد بْيِثْبِت هادا الشّي. ولَهِيك الْأَسَد ما بيحِقّ لُو يِفوت عَلَى غابِتْنا إلّا بِإِذْن مِنّا.

زَوجةْ الثَّعْلَب: الْأَسَد وِصِل لَسْياج بِيتْنا وإِنْت عَم تْقول سَنَد.



الثَّعْلَب : رَح قْلِب الدُّنْيا عَلَى راسُو إذا تْجَرّأ وفات لَهُون.

زَوجةْ الثَّعْلَب: الْأَسَد وِصِل لَهُون وهُوِّي قِدّام بِيتْنا.

الثَّعْلَب : يَلّا ضِبّي غْراضِك بْسِرْعة ولْحَقيني.



زَوجةْ الثَّعْلَب: طَيِّب فَرْجِيه (فَرْجِيُّو) السَّنَد وخَلّيه (خَلِّيُّو) يِقْراه.

الثَّعْلَب : يَلّا نِهْرَب يا مَجْنونة ونِسْلَم بِجِلِدْنا. مين بْيِقْرا؟ ومين بْيِكْتُب؟

زَوجةْ الثَّعْلَب: مين بْيِقْرا؟ ومين بْيِكْتُب؟ آه، يا جَبان!



الثَّعْلَب : "مِيّةْ كِلْمةْ جَبان ولا كِلْمةْ الله يِرْحَمُو (يرحمه)"!

 

https://www.facebook.com/you.write.syrianews