يا ريت عندي براعة في سحر هاروت                   وخاتم وهدهد ابن داوود خدامي

ت كنت شيّد الك بين النجــوم بيوت                    وسهّـر عليكي القمر مطرح ما بتنامي

وإغزل وانسج من رياش الطيور تخوت                  وطّرز سريرك بزهــرة فـل وخزامي

وإنشر عليكي الغفى وحّول الصوت سكوت               وإفرش طريقك حرير وريشة نعامي

وبكير وعّي النحل يجمع رحيق وقوت                    ولما تفيقي وبحضن الورد تـتــرامي

قدّم بإيـدي الشهـد والمـاورد والتـوت                 ويذوب لون الورد على توتك الشامي

وع البحر انزل تجيب العنبر من الحوت                  وإجمع للآلئ المحار كنوز قدامي

وبالحُسن تـتــوجي بمحـل عشتروت                وعلى جوّانح الحب التقدير تــنقـامي

ومازال ما في أمل من حبّنا المكبوت                     وبعدك غــريـبـي وغـيابك سبب آلامي

بدعي لرب السما يوم التلاقي نموت                       موتة غريب وغــريبي جرحهن دامي

ويشيّعـونا الأهـل وتـنـيـنا بتابـوت                وما يضّل منا غير اسمين على رخامي