حسّيت , من تطْليعتك فيّي متْضايقة ,, وكتير مقهورة !!
و من دمعةِ الْ نزْلت عإيديّي حفْرت بكفّي مْن القهر جورة!!
*********
وحسّيت , بدّك وضّح القصّة (العصفور مَ تْلاقى بعصفورة؟)
شو جابرو بالورد يتْوصّى ؟؟ و تْصير قصّةْ حبّ مشهورة؟!
************
و بالرغم إنتي بْتعرفي شو صار! و ياما حكيتلّك ألف مرّة !!
مَ بْتعرفي العصفور حرّ, وطار اتْلاقى بوردة وْراقها , حرّة !
***********
و تنْقول طار,وعاكس التيّار العصفور عاشق, كيف منْلومو؟
و الحبّ لمّا يْغيّم المشوار رح تِغْرقي , لو شتّت غْيومو !!
**********
و بيناتهن ,,, رزنامة الأيام ما فتّحت هالباب ِلمْسكّر !!
و تيصارح الوردة على الأنغام فاق الصبح من عادتو وبكّر
لوّن رياشو ,, بريشة الأحلام اتعطّر, ونقود حبّة السكّر
و قْبالها فرفد جْناحو و حام و بلّش شو بدو يقول يتْذكّر؟!
***********
و من بعد ما اتذكّر: عزف الحان والفل صار يفل عالمطلع !
و الياسمينة تغازل الرّيحان و صار الحبق باللحن يتْوجّع !
***********
الوردة : انْشدّو وْراقها, تخمين عرفِت شو مغزى سرّ إنْشادو
و عملت الحجّة : شفافها الحلوين بيتفرّقو عن شكل منقادو !
**************
و منشان ترسم زيح للأشواق اعتذرت لحب العاشق الأسمر ؟
و قالت : أنا ما بقبل العشاق تا صير وردة لونها أحمر !!؟؟
************
العصفور صدّق هالحكي واهتمّ قصقص جناحو وصار يتْعرّا !
و من كتر ما نقّط عليها دمّ !! صارت الوردة خدود مِحْمرّة!
*************
انْبهرت الوردة بمنظر العصفور اتخبّت مبين وراق خجلانة !
و ألله خلقلا الشّوك متْل السّور تتضلّ طول العمر ندمانة !!؟
************
و من هيك ,: لازم يعرف الإنسان الْيا ريت ما بتْعمّر بيوتو !
شو الفايدة من الحب و الإيمان لوما ع قلب العاشق يفوتو؟
وشو الفايدة من :عاشق وولهان لو مات صوت الحب بسْكوتو؟
العصفور والوردة بهالعنوان صاروا مَتَل ..: تنقدّر العشّاق ....:
من قبل ما كرْمالنا يْموتو !!!
Powerd By:Syria news IT
