شخصيات القصة:

ديبو : حلاق ...ونصف فيلسوف

أبو العبد : موظف منتوف

أبو ناجي : كومبارس نزل بالقصة تنفيعة لتعبئة كرسي الحلاق.

ديبو : وين صفنان أبو العبد.

أبو العبد : بالهلدنية.

ديبو : وين بالتحديد بالدنية صفنان.

أبو العبد : صفنان بالغلطة الكبيرة اللي ارتكبتها من عشر سنين .....وحاسسها رح تخنقني اليوم.

ديبو : أية غلطة ........أنا اللي بعرفو أنك أكبر غلطة ارتكبتها بحياتك أنك توظفت , بس كانت من أكتر من عشرين سنة ....وبعدها بكم سنة تجوزت , وما بعرف إذا كنت بتعتبر زواجك من أم العبد غلطة ؟ على كل حال صرلك متجوز أكتر من عشر سنين بكتير.

أبو العبد : لا هي ولا هي.

ديبو : لكن شو صاير معك ........والله غليتلي قلبي.

أبو العبد : مذكراتي..........

ديبو : مذكراتك ؟

أبو العبد : من عشر سنين قلت لحالي ليش يا أبو العبد ما بتكتب مذكراتك متل كل هالعظماء والمشاهير ..........ما بتعرف بجوز بيوم من الأيام بياخد هالمذكرات شي كاتب مسلسل تلفزيوني أو مخرج بالسينما وبتتخلد قصتي .........وبيرفعوا ولادي راسون فيني بعد ما موت .......... وصرت اتخيل اسم هالمسلسل أو الفلم (( كفاح موظف أو أبو العبد من المهد إلى اللحد)) وصرت اتخيل الممثل اللي بدو يمثل قصة حياتي و والممثلة اللي رح تلعب دور أم العبد، وسافرت بطموحي خيالي لأبعد من هيك .............بس اليوم اكتشفت أنو اللي متلي ما بحقلو يحلم ولا يتخيل وحسيت أنو طموحي مات وحاسس حالي رح موت من زعلي عطموحي ............وكل هالشي لأني كتبت هالمذكرات المشؤومة.

ديبو : طول بالك أبو العبد نص الألف خمسمية , ولو.....يا أخي لو شو ما صار بكفي أنو ما في حدا بالحارة ما بحبك وبيعرف نزاهتك , وأنك خدمت هالبلد كل هالسنين وما دخلت على بطنك لقمة حرام......لك أنت يا أبو العبد عملة نادرة مو هيك أبو ناجي

أبو ناجي : أي والله.

أبو العبد : إذا عرفت قصتي رح تعذرني.

ديبو : بكفي ولادك يقروا المذكرات ويعرفوا أديش أبوهن عظيم .

أبو العبد : بالعكس ..... أنا خايف توقع هالمذكرات بإيد حدا من ولادي , ويعرفوا أديش أبوهن تافه ومالو قيمة .

ديبو : روق أبو العبد.

أبو العبد : اسماع شو صار معي ورح تعذرني .

ديبو : هات لشوف.

أبو العبد: متل اليوم من عشر سنين مسكت ورقة وقلم وكتبت شو عم يصير معي بالتفصيل......كتبت كيف رحت عالشغل الصبح ورجعت بعد الظهر وشفت أم العبد حاطة الغدا... وأكلت ونمت .....ونزلت المسا عالقهوة ومريت سلمت عليك ورجعت عالبيت نمت ,وتاني يوم نفس الشي ....وما بيتغير معي شي طول الأسبوع إلا يوم الجمعة, ويوم الإثنين بتكون أنت مسكر.

وكتبت كيف أنو بعشرين الشهر بخلص معاشي وببلش أدين من الخضري والسمان لأول الشهر...........صدقني يا ديبو من عشر سنين لهلأ الشي الوحيد اللي تغير بمذكراتي هو أنو الراتب صار بيخلص معي بعد 15 يوم .....وخطر ببالي أنو صور هالمذكرات بشي مكتبة , وصرت صور هالمذكرات لبعد كذا سنة بما أنو ما فيها شي عم يتغير ........ يعني أنا كتبت مذكراتي لأتقاعد .

ديبو : وشو صحاك بعد عشر سنين.

أبو العبد : طلع معي تعديل جديد خلاني عدل بالمذكراتي لأتقاعد.

ديبو : شي منيح كتير يعني صار بحياتك أكشن.

أبو العبد : التعديل اللي صار مو بحياتي.

ديبو : لكن بشو.

أبو العبد : بالراتب........لأنو هالسنة كل شهر عم يخلص الراتب قبل بوقت ...... يعني كان يخلص بعد 15 يوم صار بعد 12 وبعدي صار بعد 10 أيام .....وبعد ما عدلت على مذكراتي اللي مصورها لأدام لئيت أنو من هون لأتقاعد بيخلص راتبي قبل 3 أشهر من أول الشهر .......شايف لك ديبو ....شايف أديش أنا تافه ومالي قيمة ....شايف ليش اعتبرت أنو هالمذكرات هي الخنجر اللي بخاصرتي .......بس أنا ما رح أسكت.... أنا ما رح أسكت...... أنا ما رح أسكت.....خاطرك ديبو.

ديبو : وين رايح أبو العبد.

أبو العبد : رايح بيع مذكراتي لبياع الفلافل بركي بلف فيها الصندويش ..... وبكون لحياتي ومذكراتي فائدة.