تعبت و تعب قلبي من هالجو و من الوضع و من هالتوتر اللي عم يصير بالبلد مؤخرا......و أكتر شي من يلي عم شوفو على مجمّع و مشرذم الناس.........من ساحر العقول و لص الاوقات و ضرة الازواج و الزوجات...........المنظوم مستر: فيس بووك
لسى.....منشارك بهالصفحة اللي بتجمع مليون صوت ضد كذا...... و منشارك بصفحة تانية اللي بتجمع مليونين صوت لتأييد كذا, و بالحملة المضادة و المؤيدة و المخونة و المناصرة لكذا و كذا و كذا........
منفوت بسباقات و منافسات بين بعضنا غير موجودة اساساً..... مننزعج من هداك لانو حكى هيك.....و من هاد لانو حط الصورة الفلانية على بروفايلو......هداك كاذب و هاد منافق....هاد سخيف و هداك فهيم.........هاد منلغيه من قائمة الأصدقاء و هداك منضيفو لأنو بشاركنا أو بيخالفنا بالرأي !!!!!
هو صحيح أنو البشر مختلفين.....و كل واحد إلوه ميوله و آراؤه و توجهاته و و و........ هالشي لهون طبيعي و هالممارسات لهلأ منطقية...........بس لما نجي و نحكي عن الوطن.....و لما يحكي عن الوطن الناس اللي بيحبوه......ما لازم يكون في كل هالإختلاف .....ماعم افهم ليش عم يصير في هالانقسامات و هالاختلافات بالاتفاق على مصالح الوطن.....ليش عم تصير كل هالغوغاااااء... و مين المستفيد؟؟؟؟؟!!!!
الوطن ابداً ما كان بيوم من الايام شخص....و لا كان فئة....و لا كان مؤسسة.......الوطن هو كلنا.....الوطن هو نحنا لما منكون إيد وحدة....إيد عم تبني و تعمر فيه....خايفين عليه و بدنا ياه يسبق العالم كلها للأفضل....
حاجتنا انقسامات و تكتلات.....و على قولة الشاعر هشام الجخ: سأمنا تشتتنا و كل العالم تتكتل.....لماذا الفرقة الحمقاء تحكمنا....... أعتصموا بحبل الله و اتحدوا؟؟
لك نحنا كلنا...... شو بدنا......غير انو بلدنا تكون قوية....قوية بناسها....الناس فيها معزوزين....عندن شغل مردوده معيّشن براحة....ما يضطروا يسافروا و يتغرّبوا ليعيشو......عندن بيوت يسكنوها......عندن مدارس و جامعات منيحة يتعلمو فيها ليبنوا البلد بأفضل صورة.....الأسعار تكون مقبولة.....ما يكون في ناس معدمة و فقيرة....ما يكون في أطفال على إشارات المرور و الشوارع.....او خارج المدارس عم يشتغلو ليعينو أهلهن....
شو بدنا غير انو يكون النظام و القانون فوق الكل و ماشي عالجميع.....ما يكون في فساد و لا سرقة و لا ظلم....
شو بدنا غير انو نحكي رأينا بدون ما نشعر بالخوف...شو بدنا غير انو الفاسدين يللي عم يزيدو الفقر بين العالم واللي مو همّن غير يزيدوا ثرواتن على حساب الناس و البلد...انن ينحطلن حد...شو بدنا غير انو الصح يكون صح و ما يتحارب من الفاسدين و يتشوه ليصير باطل.....شو بدنا غير أنو الناس المصلحين يكونوا بالمكان الصح, و ما يُتهموا بالعمالة و التخريب و الصهيونية و امتلاكهن لاجندات مرّيخية تخريبية و و و و.....
بعرف أنو نحنا مو بالمدينة الفاضلة....بس كمان بعرف و متأكد أنو وطننا ممكن يكون أحسن و أكبر و أحنّ و أجمل بمئات المرات...............
طيب و بعدين؟؟؟؟؟
شو الحل......؟؟ ما بدي هاجر.......... ما بدي سافر و أبعد عن وطني.........وطني أحقّ بجهودي.... بدّي استثمر حياتي و جهدي هون...بوطني...و لوطني........ بدي ولادي ما يلومني بكرا لاني ما سعيت لابنيلهن وطنن يللي هنن و نحنا منستاهلو...
أنا بحب و طني.........بس وطني كل يوم عن يوم عم يصغر و يصغر..... و يصير أضيق و أضيق.......
الوعود بالتحسين و التغيير و الإصلاح......موجودة..... الجهود المبذولة للتغيير و الإصلاح.......كمان موجودة.....بس السنين عم تمر علينا....متل ما مرت على آبائنا...و كمان جدودنا.......و هلأ علينا.......الناس عم تكتر........و فرص العمل و الأجور بتناقص مستمر......التضخم و مشاكل الحياة بازدياد..........
نحنا الشباب......شباب هالوطن......نحنا المسؤولين قدام الجيل الجاية....قدام ولادنا.....إنو يكون وطننا وطن.....يسمحلن يعيشو فيه بكرامة و راحة..... نحنا المسؤولين انو نبني وطننا....ليكون عنجد وطن......مو بس مكان.... ولدنا و كبرنا فيه و تعودنا عليه و على كل شي فيه.... مو بس شعارات منرددها و منتوهّم انو هيك بتكون المواطنة الصح.....
في تغييرات لازم تصير.....تغييرات جذرية......و اصلاحية.....عجميع المستويات.......و نحنا الشباب لازم يكون دورنا الاكبر......بتمنى يتفعّل كل شي بالبلد بالشكل الصح ....من اصغر لاكبر مؤسسة....عامة و خاصة.....
الله يوفقنا كلنا بطريق انو نعمل الصح لبلدنا و لنختار الصح لبلدنا و لألنا و لولادنا.............أنا واثق....انو الناس اللي بتحب وطنها عنجد............مستحيل يختلط عليها الصح و الغلط خاصة لما بتكون مصلحة البلد بنظرهن قبل أي مصلحة شخصية لأي حدا....
أعزائي...بدي أطلب منكن طلب........بدي أطلب من كل واحد منكم....يرجع يشوف أفكاروه الحالية و توجهاته......و يشوف...هل هي بالفعل عم تخدم بلدنا أولاً و لاّ لأ ..........هل هي عم تخدم مصالح الأشخاص قبل الوطن و لاّ لأ......الموضوع بدو صدق مع النفس و شجاعة........و تفكير خارج الإطار اللي تعودنا عليه....
أخواني.......... حبيت فكر معكن بصوت عالي....كتير ضروري بهيك أوقات......نكون ملتحمين و متحدين.... متفقين على نقاط الاتفاق و الاختلاف (إن وجدت) و أهم شي واعيين لحقوقنا و واجباتنا كمواطنين منحب بلدنا....
شكرا لتفكيركم معي....و أيضاً لنقدكم البنّاء.........و عذراً على الاطالة و استخدام اللغة العامية
Powerd By:Syria news IT
