لما بيقول الطبيب

هاد المريض ما بيستنى معنا ، لازم نعملو عملية فوراً

بيكون قصده

لازم نلحق نعمل عملية لأن لو استنينا رح يطيب المريض لحالو و تروح علينا الفرصة .

- لما بيقول الطبيب

انت محتاج تعمل شوية تحاليل

بيكون قصده

من الآخر أنا ما عرفت شو عندك ، بلكي الدب يلي بالمخبر بيعرف و بينورني

- لما الطبيب بيقول

استعمل الدوا هاد ، و تعا لعندي بعد بكرى

بيكون قصده

تعا بعد يومين لبين ما كون سألت حدى بيفهم لأنو هاد الدوا لا بينفع و لا بيضر

- لما الطبيب بيقول

شو تاريخك المرضي

بيكون قصده

بدي أعرف أسماء الأطباء يلي بتروح لعندون لأعرف أنت دفيع و لا لاء

- لما بيقول الطبيب

بشوفك بعد عشر أيام

بيكون قصده

لازم تدفع معاينة جديدة ، شو ما قريت شو مكتوب على الكرت ( المراجعة مجانية خلال أسبوع )

- لما بيقول الطبيب

كويس عنا خبر حلو و خبر مو حلو

بيكون قصده

الخبر الحلو إني أخيراً رح اشتري سيارة مارسيدس و الخبر المو حلو انو رح تدفع حقها أنت لأنو عندك مرض خطير و أنا رح عالجك .

- لما بيقول الطبيب

نحنا رح نتابع تطورات الحالة أسبوع كمان قبل ما نعمل أي إجراء

بيكون قصده

عليك بالصبر يمكن تتحول هل بلوة لشغلة نلاقي لها علاج

لما الطبيب بيقول

اعمل التحاليل بالمخبر الفلاني فأنا بثق بنتائجهم

بيكون قصده

بيدفعولي عمولة 40% من ثمن التحاليل

لما الطبيب بيقول

أنا رح حولك لعند أخصائي يشوف حالتك أحسن مني

بيكون قصده

أنت صحتك مثل الفل بس الزلمة هاد صاحبي و مزنوق على قرشين و واجب نفعه .