انتي ماشي بالطريق يا غافل الك الله.. ما بتشوف الا كيس زبالة نازل عليك من السما وهب خبط على الأرض والشارع تعبا زبالة بتطلع لفوق بتلاقي واحد عما ينظر نظرة المنتصر من البلكون وعيونو عما تنطق (انا حر بعمل اللي بدي ياه)!!!
بتوقف سيارة تكسي وقبل ما تفتح الباب. الشوفير بيسالك "لوين؟؟؟؟" وطبعا انتي مضطر انك تجاوبو ..وبعد تفكير لعدة لحظات بيجاوبك "والله ماني رايح لهونيك" وعلى وجهه نفس النظرة السابقة :(انا حر بعمل اللي بدي ياه)!!!.
بتلاقي واحد صافف سيارتو بنص الطريق ومعرقل السير ووراه شي عشرين سيارة وهوي عما يضحك مع بياع الدخان..... وعما يمارس حريتو على الآخر!!!
الموظف يتعامل معك بكل حرية. فاذا كان مبسوط ومروء بيمشيلك معاملتك واذا متقاتل مع مرتو فالمعاملة نامت شي اسبوع .....خيو حرية شو بدكم بالحكي!!!
بترجع على بيتك بتلاقي صاحب الدكان اللي جنبك محتل الرصيف بالبضاعة وحاطط كم كرسي واركيلة ولامم الشباب وسهرانيين ...بكل حرية؟؟!!
بتدخل على البيت بدك تنام بتسمع صوت مسجلة عما يصدح صدح بتركض على البلكون ما عما تعرف الصوت من وين والا بتشوف واحد من شباب الجيران قاعد على البلكون ومعلي صوت المسجلة على الآخر ....(خيو انا حر بعلي صوت المسجلة على كيفي)!!!
السيارات ما بتوقف على الإشارة وإذا وقفت ما بتحترم خط المشاة..والمشاة بدورهم مانهم انظم ..ما حدا منهم بيستنى الإشارة أو حتى بيفكر انو بقطع الشارع من ممر المشاة (ممارسة للحرية "أنا بقطع الشارع من وين ما بدي)
طبعا هذا غيض من فيض متل ما بيقولو ولسا حالات ممارسة الحرية اكتر من أن تعد أو أن تحصى
لذلك أرجوكم.. أرجوكم حاجتنا حرية والله انتخمنا حرية
طبعا الجملة الأخيرة غير صحيحة لان الحرية الحقيقية في أي مجتمع هي سيادة القانون على الجميع وعلى قدم المساواة وتطبيقه على كافة نواحي الحياة الصغيرة قبل الكبيرة
وان ما نمارسه الآن ما هو إلا مفهوم مشوه للحرية .ولذلك أرجو أن نصحح مفهوم الحرية في أذهاننا حتى نعرف كيف نصل إليها وشكرا
