لما تفكر أنو تفل
لا تنسي تسقي الوردات
وحط الوردات بالظل
لا يحترقو بالشمسات
و قيم الفيش من البراد
و فضي كل شي جواتو
و لملم لعبات الولاد
يلي بتحمل ضحكاتن
خدلك منها شي تذكار
تتذكر بسماتن
و حطلي المفتاح هنيك
مطرح ما كنا نحطو
و اتركلي ورقة صغيرة
حتى اعرف عنوانك
و لاتنسى تكتب عالباب
رح نرجع لو بعد غياب
و مرق ايدك عالحيطان
حتى يحسو بحنية
و لاتقلن اني هربان
قلن راجع عشية
و بكرة بيلتموا الأحباب
وضحكاتن توصل لبعيد
و لما بيعودوا الغياب
رح نرجع نبني من جديد
اوعى تنسى السجادة
يلي عليها بتصلي
بركي منها بتتذكر
شو صارلك وشو صارلي
يا بلدي شو صايرك
قطعوا وردك مع فلك
حتى ضحكات الصبيان
صارت دمعة و بتقلك
مارح ننسى يلي صار
و بدنا نذل الي ذلك
حاجة ضرب و حاجة قتال
حابب قلك كيف الحال
بكرة بتلعنا الأجيال
حلك يا بلدي حلك
و لاتنسى تكتب عالباب
رح نرجع لو بعد غياب
ورح ضلي نادي باسمك
بركي صوتي بيوصلك
