ساندريلا التسعينيات ...من ذكريات
الزمن الجميل ..أيامنا الحلوة ..
شغلت قلوب الملايين ..الكبار قبل الصغار ..والرجال قبل النساء ..عندما تطل علينا
يوميا ..تصاب المدينة بالشلل..وكأنها هيروشيما بعد المصاب الجلل ...
ليست من الصف الاول كجمال سليمان أو أيمن زيدان
....ولكن بعشقنا وهبلنا بها حولناها ل سندريلا الزمان ...
بديت الشارة ...بديت الشارة...؟؟؟؟يعلنها فصعون العيلة مدوية ..نفسوا يلي ..ويلي ..
مجرد سماع الشارة يلي بتبدا بكلمة ((ربيع العمر أخذه هوانا .))؟؟..طبعا كساندرا
المسكينة ما بتعرف أنو ربيع العمر قصف هوانا ...وشرشح حالنا ...
المهم بديت الشارة ..وبلش رالي السيارات ..والمسبات ..وكلو بدو يلحق ..شوماخر نفسو
طلع من الموضوع ...كساندرا بنت غجرية مسكينة معترة ....ماعندا حق تياب ..وهاد سر
نجاحا ..لو كان معا مصاري كان ماحد تضامن معا ..شو بدك بالحكي من يوم يومنا منحب
أغاثة الملهوف ..بنت مكافحة ...مخلصة ..صحي حبت إغناسيو شي 70 حلقة وماخلو ستر مغطا
..بس قلبا كان مع لويس دافيد ليش الكذب ..وراندو هوي كان ملزق عليها ..كساندرا صارت
وحدة من العيلة السورية ..وين مارحت بتلاقيا ..بالبيت بتشوفا ..بالحارة ...بالجامعة
بتلاقيا جنبك عالمقعد ..بالشارع بتلاقي 100 كساندرا مستنسخة ...مع أختلاف المقاسات
والأحجام ...
ما ضل حدا ما حب وشاف كساندرا ...شخصية مقبولة من الجميع وأيديها غير ملطخة بالدماء
..وغير متورطة باي عمل أرهابي ..مقبولة من كل الطوائف ..يعني بالأخير كانت فرصتنا
الوحيدة لتوحيد البلد ....والخروج من الأزمة ...ماأحوجنا أليك ياكساندرا ...
لو عرضو مسلسل هالمستورة بأيامنا هلق ..كان ما بدنا جهود ((دي مستورا ))لوقف إطلاق
النار ...أنا بضمنلو بساعة العرض ما تنضرب ولارصاصة خاصة من داعش ...وإيصال جميع
المساعدات الانسانية بأمان ..والحياة ستكون طبيعية ..
بساعة العرض لاتفكر بأي نشاط ..غير بالسرقة..أو شي راندي فو ...
بيخلص المسلسل ...وكلو حزين والدمعة مغرغرة بعينو ...الحجي مشتهي يجدد ...والبنت
عمتستنا لويس دافيد ...والصبي رح يطوف بكرا بكلية الاداب بحثا عن كساندرا ...والحجة
بالسوق بدا فستان كساندرا ....ماحدا أحسن من حدا ...
كساندرا لمت شمل العيلة بغرفة وحدة ...عند غروب الشمس الساعة 5 ........
دمتم بخير(( 20 ))
https://www.facebook.com/you.write.syrianews
