اليوم حاسو مكركب شوي ...فقت الصبح كالعادة بقمة النشاط الساعة 12 صباحا ..تذكرت أغنية (بابا فين ..بابا هينا ..هينا هو بالصالون ...) مع أنو اليوم لازم قول ماما فين؟؟ ...أو بالأحرى لازم قول أنا فين؟؟ ...حسيت حالي الله وكيلك عمبلعب طميمة ...فتحت الفيس ..لقيت مواقع التواصل الأجتماعي تشتعل ...مسكينة مواقع التواصل الأجتماعي دايمن عمتشتعل ...المهم ..اكتشفت أنو اليوم عيد ست الحبايب العالمي ....
متلي متل كل مغترب مجقوم بسط ....مسكت الجوال صديقي
الوحيد بالغربة ..وضربت 00963 ...
00963 هي أمي ووطني وأحبابي ...صار يرن ..ويرن ..ويرن .....
كلنا مشتاقين وقلوبنا ملعون فطاسة شوقا ..هلق صحي الأم مدرسة وممكن بعد فترة تصير
جامعة ...وهي نص المجتمع ..وقريبا يمكن تصير كلو ...بس عزيزي المغترب لازم ما تشوف
بعين وحدة ...خلي الرؤيا تكون واضحة ..وقعود معي راجع تفاصيل حياتك مع أمك ...وتذكر
الشحاطة يلي رسمت لوحات تضاهي رسومات ليوناردو دا فينشي على جسمك ....
ياسيدي مو بس هيك ياريت تتذكر كم مرة نسيتك أمك على كرسي التواليت وأنت عمتصرخ بأعلى صوت ( ماماااا تعي غسليلي ))) وبالأخير بتقضي الليلة نايم بالحمام ولسا أمك وأم عبدو ماخلصو مؤامرة على أم بكري ....صحي متل ماقالت فيروز (هيدي أمي تقبر قلبي ) بس لازم ماتنسى كيف أمك كسرت قلبك وماخلتك تتجوز البنت يلي حمارك الداخلي طبس فيا ...
كمان هي معلش بضل هي ست الكل بس مو معقول كل يوم لازم تنيمك غصب بالعنك الساعة 7 حتى لوكان تاني يوم عطلة ..وين حقوق الطفولة ..وين منظمة SOS...وين سفيرة النوايا الحسنة أنجلينا جولي ..لك وين قلقك يابان كيمون ..وين أحساسك يابرواز حسين ..
والله أنا ما بشيل بقلبي يا أمي بس مو ظابطة معي أنو كل ماقلك شي سر لاقي بابا
عميقتحم غرفتي مشان يقيم الحد علي ...
مارسيل خليفة بحب قلك أنو كلنا اشتقنا لقهوة أمنا ..بس الشي يلي غايب عن حسك الفني
أنو كنا ناكل كفين متل فراق الوالدين إذا مدينا أيدنا عالقهوة بصغرنا ...
حافظ ابراهيم بعرف أنو الأم مدرسة بس أنا بالأخير إنسان مو معقول أرجع الضهر من
المدرسة مشان فوت بمدرسة جديدة لهل الدرجة شايفني جحش يعني ...
غوار الطوشة صرعتنا من 50 سنة بيامو ست الحبايب يامو ...يا أخي أمي عراسي وبتمون
على هالرقبة ..بس كمان أنا ناقصني شوية كرامة ....مو كل مابيجي عنا ضيف ...ما بسمع
غير سمفونية ...سكوت يا ... يلي بدو يفتح تمو بدي .....لك خلوا على الله .....
ألو ......ألو .....
أهلين ماما والله أنا تعبان ...ومابدي غير حضنك ...ومعلش رح أفتح صفحة جديدة معك ..وماكان
قصدي أني ثور عليك وأغترب ..بس وعدوني بالربيع ..وطلع بالأخير كلو عميشتري ويبيع
.....والمسامح كريم ...و...بحيك يا أرق و أجمل إمرأة بعالم حواء ...
دمتم بخير
https://www.facebook.com/you.write.syrianews
