ليش هربت من البلد... ؟
قله:
ما هربت من البلد هربت من القتل و الضرب اللي ماعم بيخلص بهالبلد
ليش ما عندك قضية لتحميها وتدافع عنها لتبقى هالبلد
قله: مبلا،بس إذا رحت أنا هالقضية رح طعمي ولادي وعيلتي بالبلد ،بعدهم مابيوعوا شو
يعني حرب
الله مابيترك حدا
وانت ليش هربت من البلد........!
كمان أنا ما هربت من البلد بس اذا فكرت بمستقبل آمن شوي بعيد عن أني قاتل أو حارب
بكون غلطت بحق البلد
بس كان لازم تحملها عالحلوة و عالمرة وكل شيء إله نهاية
إنشالله، بس دايماً كنت خايف تكون النهاية عندي وما لحق وصل لنهاية هالحرب
وإنت ليش هربت من البلد......!
أنا ما هربت بقيت لآخر نفس بس كل اللي حولي راحوا ماضل حدا وهنن بصراحة كانوا
بمثلولي حياتي بهالبلد ،شو بدي ابقى اعمل لحالي طلعت ولحقتهم
وما فكرت اذا هنن مبسوطين برا ولا لأ او انت شو بناسبك؟
لأ ، لان مشكلتي كانت هيه ماضل لوحدي واخسر رفقات العمر
وإنت ليش بقيت بهالبلد.......!
ههه ،أنا لأن ما توفر معي مبلغ لسافر برا البلد حتى بموسم التهريب ما قدرت، فبقيت
وقلت لادعم هالبلد
يعني مو فكرة إنتماء للبلد ؟
مبلا بس يعني فكرة إنتماء خدمتها فكرة مافي إمكانيات
وإنت ليش بقيت بهالبلد...... ؟
أنا شو بدي اطلع إعمل بالغربة ،كبرت وعمري ماعاد يسمحلي إتأقلم مع جو جديد و ناس
جداد ،فبقيت بهالبلد مستحمل القصة أفضل ما اطلع لبرا و تكبر الغصة
وإنت ليش تركت البلد........ ؟ لوين رحت؟
أنا إستشهدت...
أنا رحت بس أخدت البلد معي و أنا بقيت وما خليت البلد تنكسر معي... أنا حاولت كون
الحاضر والغايب بهالبلد
مازرت بيت حدا بس حاولت احمي بيوت الكل لأن إنتميت لارض مو لبيت او حارة
ومافكرت للحظة تهرب ؟
بصراحة مبلا بس ماحسيت رح يكنلي قيمة برا متل قيمتي هون ،ماتقبلت شعور الشفقة من كل
شخص بيعرف إني غريب ،ما إستحملت اقعد بلا هدف او تحت شروط بتوجهك لهدف ممكن
مابترغبه
فكرت بالحرية كتير بلا وجع راس وقتل وضرب كله تخيلته برا ،بس للحظة حسيت إنه في شيء
غلط لما بتشيل وردة من جذورها و بتحطها بمزهرية ما بتموت وبنفس الوقت ما بطول لتعيش
بذات الوقت إذا خليتها بأرضها قد ما واجهت عواصف و ظروف قاهرة جذورها بتضل بتقويها
و لك حتى ولو ماتت بضل في نبتة تانية بتخلق محلها...... المهم مايفضى مكانها و
تتعبى المزهرية
لهيك بقيت بهالبلد!
https://www.facebook.com/you.write.syrianews
