مع أني ما صرلي زمان راجع من الشام ,,,,اشتقت لسوريا

للنكات الجديدة اللي منسمعا كل يوم,,,اشتقت للزحمة واللهفة لما تلاقي تكسي بعز دين العجقة 

للميكرو الصبح لما تكون الناس فايقة و رايحة عالشغل وصوت فيروز عم يلعلع بالحارة من دكان أبو تحسين

لإذاعة دمشق ,,,لما تكون راجع بعد الضهر وحكم العدالة معليه الشوفير والناس ساكتة عم تسمع وماحدا اله قلب ينزل ,

لرغيف طري ممكن اي سوري يضيفك ياه لأنك اشتهيت من الريحة

وعسيرة الريحة محمصة البن والبزر اللي بتشهيك وبتخليك تشتري- متل ما الله خلقك-

لسوق الخضرة اللي بتطلع منه متخوم من المشترى ,,,بضيعتنا في نوع من العنب يسمى –المقيقي أو البقبوقي أو البلدي ,,,والي نفسه قال جبران عنه :والعناقيد تدلت كثريات الذهب ,,,موجود بكثرة عأشجار البلوط أو السنديان كنت حبه بكل حالاته لما شفته هون بالغربة أكلت حبه منه كان سعر العنقود حوالي 6 يورو يعني شي 370 ليرة سورية ومكتوب عليه-بيو- يعني طبيعي 100بالمية هرت الدمعة من عيني قبل ما ابلع الحبة   كل ما شفته وكل ما اشتريت شي هون بقول : الله يعز ترابك يا سوريا

اشتقت حتى للناس اللي ما بتخطر عبالي. العمى شو بتمنى ما حدا يكبر ولا يموتوا حتى لاقيون متل ما كانوا,,,يالطيف شو مشتاق لبولمان القدموس خاصة بعد استراحة حمص لما يصير الطريق باتجاه الساحل ويبلش لون المنظر يصير أخضر

كنت ما أكره حالي إلا إذا طلع جنبي شى مرا ومعا ابنا الصغير واللي نادرا ما في بإيده صندويشة,,,شو مشتهي صندويشة فلافل من أي مكان بيساويلك ياها بخمس ثواني ,,لك وطيبة ,,مع عيران أو كولا ,,,ما بتفرق ,,المهم بتشبع وببساطة كتييير طيبة ... تعا احلام فيها بالغربة , أو شي قعدة بشي قهوة  واسماع اسمااع يا معلم المسبات اللي بيضحك واللي بيبكي  لستي تبع الضيعة اللي أبعد مشوار سافرته هوة القمصية –طرطوس 31 كيلو متر , واللي كل ما شافتني بتقللي كيفا روسيا ,,,لعمماا شومشتااق لهالطيبة والبساطة..

لانصراف المدارس جنب بيتنا واللي كل ما شفته بتذكر دورة حياة كل مراهق 

لرمضان و برامج القناة الأولى و للمسحر اللي بدو عيدية كل جمعة ,,, للفتيش –البطريق – الي كنا نلعب فيه اول يوم العيد, ,,ولشي مشوار مع الشباب بنص الليل عالشيخ محي الدين مشان ناكول فول أو فته...ياما واقفين وأكلين فول من عرباية الفول وإذا كنت زبون البسطة بيكرمك بزبدية مرقة ببلاش ....

طبعا ايديك دفياننيين وجسمك عم يتكتك من البرد,,,,لما ارجع عالبيت كان عنا صوبيا مازوت  الشمس,,مو غريبة عنكن , لما كنت قويا كانت تساوي الغرفة متل حمام السوق ولما تنطفي ,,ركود لحقا لانه اذا انطفت لازم تبرد ,مشانا اذا شعلتا مرة تانيه ما تنفض بوشك وتولول أمك....

ملعون ابو الحضارة و اللي بيقول نحنا مو عايشين ....لما نوقف مشان طلب تمديد الاقامة بيتطلع فيك موظف يا أسود ,,يا أخضر ,,,وغالبا أبيض عأصفر هوة ذاته ما بيعرف مين ابوه أو أمه,,,بيتطلع فيك من فوق لتحت وبيعرف انه حصيلة شغل خمس او  ست سنين من عمرك رح تاخدا بلده مع العلم انو عنه مكتوب انك ممول من الحكومة السورية بحسسك بالذل اللي بحياتك مما بتحسه ببلدك مشان الله في بني اادم بسوريا عنده كرامه بيتمنى  يصير معه هيك ؟؟؟؟

انا ما بقدر قول نحنا منظمين أكتر ولا متقدمين أكتر, بس يعلن ابي يوم اللي بدي أقول هنن أنظف,,,أو أطيب  أو أحسن, البساطة اللي نحنا منقتنع فيها الكنز, هي الروعة هي الغنى , هي الابتسامة اللي بشوفا على وجه كل واحد فيكن- اللي عم يقروا المقال-

هي الكنز هييي الكنزززز صدقوني ورا كل ذكرى بسيطة ذكرتا معاني كبيره وقيم ما بتموت ,,,فيروز لما غنت ماغنت لبرج أيفل غنت لحجل صنين وشافته بالعلالي أكتر من برج أيفل ,,,,لما غنت ما غنت لسلفادور دالي ,,غنت هيييهاااااات يا بو الزلوف,,,,وصلت للعالمية من المحلية ,,,,بتمنى نضل نغني لهالبلد الحلو اللي بيكبر فينا وبيصغر بسببنا , مهما صار سوريا غالية ,,,ومهما صار رح نضل سوريين وسمعتنا هيي بلدنا  اللي الله يحميها ويديم عليها السلام والأمن والمحبة بين الناس ,,,, بتمنى ما حدا يعلق ,فشيت خلقي

وسيم أحمد ,,,,نانسي/ فرنسا