المستقبل ...... لماذا المجتمع لدينا يخاف من المستقبل وبالأخص الطبقات المتوسطة و الفقيرة.
بصراحة أن الحياة صعبة وقاسية والإنسان يتعلم من تجارب السابقين ويكون عبرة للاحقين , في البداية يعيش المرء بشكل اعتيادي في سن الطفولة فلا يشغل فكره بأي أمر من أمور الحياة بينما يكون والداه مشغولان في التفكير بمستقبله والتخطيط بكيفية خوض هذه المعركة الصعبة بحيث يبدأن بالتخطيط كما يلي:
أم محمد: صار عمر الولد خمس سنين ولازم نحطو بالمدرسة تحضيري, أبو محمد: ليش يا بنت الحلال في بالمدارس العامة صف تحضيري....شو عم تقول أنت...... شو مدرسة عامة بدك الولد يطلع بالمستقبل فلتان وبدك ما يتعلم شي لا بدك تقيم هل الفكرة من راسك خلص مدرسة خاصة أنتها النقاش....أبو محمد: يا بنت الحلال إنا من وين بدي لحقلو مصاريف والله شي بهد الحيل, حبيبي هاد مستقبل مو لعبة.
بالنهاية أم محمد بتدلل شوي و بتظبط الوضع و بيكسر أبو محمد البصلة وبيرضا يسجلو بمدرسة خاصة.
بوصل الشاب محمد للبكلوريا أمو و أبو وحتى كل العلية مستنفرة مو بس أيام الفحص لا من الصيفية تبع البكلوريا و بيحتارو وين بدون يسجلوا لأنو معروف البكالوريا عنا صعبة المنال وحلم بعكس الدول المتقدمة يلي بتخلي الاختصاص حسب الرغبة المهم بتبلش سنة الرعب عند محمد الكل بيعرف شو بكالوريا بالسوري يعني مرادف لكلمة مستقبل.
كل البيت والعيلة ويمكن الحارة عايشة مع المسكين محمد عندو سنة تحديد مصير بعد كل العناء والمشقة وسهر الليالي طلعو النتائج ومعروف عنا كل ما نقصك علامتين راحتلك كلية وكل يلي عنا عشر كليات متل العالم المسكين محمد ما طلعلو ولا كلية.
أتدمر مستقبلو شو بدون يعملو بشان يلحقوا مستقبل الصبي ببلشو بدون يحطوه بالجامعات الخاصة وما أدراك ما الجامعات الخاصة نهر مصاري المهم يطلعلوا بشي لقب علمي مهندس طبيب شو ما كان والمسكين ما بيعرفو انو هل الشغلات ما بتطعمي خبز هل الايام بيدرس وبخلص و عنا كل شخص الو فترة خاصة للأستجمام بيبعتو فيها على الجيش بيرجع من الجيش ليدور على وظيفة بشهادتو المسكين.
رجع المهندس محمد من فترة النقاهة مفكر انو الشغل عم يستناه وفاتحلو ايديه بيدور بالدليل ع الوظائف بيلاقي الاعلان المناسب مطلوب مهندسين بالاختصاصات التالية....... الخ ,بيفكر الافندي انو أول ما بروح بيستقبلو وبيوقعولوا ع العقد على بياض وبيوافقوا على شروطوا وعلى أي مبلغ بيطلبو على أساس هو شي شغلة.
بيروح على المكان المذكور أدناه وإذ بيتفاجأ انو في قبلو طابور......طابور من المهندسين بيستنا دوره بعدين بتقلوا السكرتيرة تفضل أستاذ ع المقابلة .
صاحب الوظيفة: عرفني عن حالك.
أنا اسمي محمد مهندس مدني خريج جامعة دمشق عمري 24 سنة أعزب حابب أتوظف عندكن بالشركة حسب مو طالبين.
صاحب العمل: وين أشتغلت قبل شركتنا.محمد: الصراحة هي أول وظيفة بدي مارسها . صاحب العمل: للأسف انا بدي خبرة على الأقل خمس سنين لأنو مالي فاتح عندي مدرسة.
وكل شي على هل المنوال بيلاقي حالو المسكين بعد كل هل التعب و الشقا صفر اليدين وبيلعن الساعة يلي حمل فيها شهادات.
وأصبح العمل وكسب المال من أصعب الأشياء ليس لدينا فقط بل في معظم دول العالم رأينا الأزمة العالمية ورأينا الثورات والاحتجاجات على سوء المعيشة وندعو الله إن يرزقنا القوة لكي لا نخاف من شبح يدعى بالمستقبل.
