كلما انتقدت شغلة متل ليش صور مرشحين مجلس الشعب ملزقينون على عواميد الكهربا وعلى الحيطان ومداخل البنايات ؟؟ مو على أساس البلدية مانعة هالشي حفاظ" على المظهر الحضاري وجمال المدينة ؟؟؟؟ بيهمس صوت بادني : مو وقتها هلأ مو شايفة البلد بأزمة ؟؟؟
بكمل طريقي ..بتطلع على الدخان اللي طالع من قفى السيارات وهي عم تنازع بطلعة قاسيون .. وين الشرطة ووزارة البيئة ؟؟ ما يخالفوا هالسيارات ويلاقولها حل ؟؟ وهادا ما...حي النمر ة والتاني طاير طيران .. بيهمس صوت بادني :
مو وقتها هلأ مو شايفة البلد بأزمة ؟؟؟
بمر من شارع الثورة ...البسطات .. والوسخ والزبالة حواليها ... مو على اساس
ممنوعة بنص البلد .. ولاقولها حل بيهمس صوت بادني : مو وقتها هلأ مو شايفة
البلد بأزمة ؟؟؟
بوصل على الدائرة الحكومية .. دارت فيني ... موظف الدولة مو على أساس بطل يرتشي
ورح يشتغل من قلب ورب ..بيهمس صوت بادني : مو وقتها هلأ مو شايفة البلد بأزمة
؟؟؟ والدولار طالع.. والشغل نازل ..والموظف بدو يعيش ..
بركض للحق السيارة قبل ما تشحطها الرافعة .. العمى مو على أساس الشرطي ملتزم ..
وبطل ياخد بخشيش ..؟؟؟ بيهمس صوت بادني : مو وقتها هلأ مو شايفة البلد بأزمة
؟؟؟
العمى بتطلع بحالي ..ما بسترجي لأنو الصوت بيهمس بادني .. أوعيك تطلعي بحالك
هدول الشغلات التافهة كتير واللي بيبلش فيون الاصلاح .. مو وقتها هلأ ... البلد
بأزمة... واصلاح ما... فيش ......... وعيش يا ... .......... مواطن .......
