كتير منسمع قصص وحكمتها بتذهلنا بس جدي الله يخليلي ياه مجنني قصدي بقصصوا من كتر شوحلوين  يعني ،   والأسبوع الماضي حكالي حتوتة حلوة كتير هلق صحيح كبرنا عقصص جدو بس والله حلوين  وفيها حكم ومواعظ  وصحيح القصة طويلة بس جد مشوقة ويا أسيادي ما أنتو سمعو هل سالفة يلي حكاها جدي  و دعولوا

كان يا مكان في قديم الزمان كان  في قرية قريبة من البحر يعيش فيها فلاح مع زوجتة طبعا كونو فلاح فهو فقير  فقرر أخونا بالله يعني  الفلاح مع زوجته ان يعملوا كم عملية نصب ليحصلوا  على شوية  مصاري  وكان صاحبنا الفلاح داهية ....

  وأول شي عملو هل فلاح قرر ان يشتري حمار أجلكم الله من احد الأصدقاء وبعدين بيدفع حقو يعني حمار بالتقسيط .. قام  راح هل الفلاح وحشى فم الحمار بالفلوس الحديد  فراطة يعني ،، وراح يتمشى بالحمار بالسوق وراح  الحمار يتقيأ ،، وطبعا كان عم يطلع الفرايط من تمه  !!

فشافوا تجار السوق وسألوه شو صاير لحمارك فقال بكل هدوء وثقة متل مو شايفين  .. عم يطلع مصاري بس قبل كانت كمية النقود أكثر بكثير وبعد ما كبر هل حمار قلت الغلة

فقال احد التجار تبيع الحمار

فقال الفلاح أي الحمار مصدر رزقي لح يكون غالي عليك ..

فقال التاجر  شو بتطلب سعر بعطيك...

فقال الفلاح ب 10000 ليرة سورية

فوافق التاجر ودفع المبلغ وأخذ الحمار

وراح هل  الفلاح لعند زوجته وقلها :بعت الحمار ...... بس المشكلة يلي اشترى الحمار لح يكتشف الخدعة شو ساوي ؟؟

فقرر الفلاح مع زوجتة يعمل خدعة جديدة .....

وبالفعل الحمار مات عند التاجر بعد ما  اشتراه بيوم واحد !

خبر التاجر رفقاتوا العواينية  بالقصة مع صاحب الحمار فقالوا  هاد واح نصاب ولازمو فلقة

فراحوا  لبيت الفلاح  طلعتلون الحرمة أي زوجته وقالت: شالسالفة يا كدعان

فقالوا لها بدنا زوجك .فقالت الزوجة راح عالبلد المجاور، وإذا بدكن ياه ضروري لأبعتلو خبر بالحال فقالوا كيف ؟

قالت لهم: عندي كلب وكل ما بدي زوجي بشي بروح بناديلو وبيرجع

فضحك الرجال وقالوا شو هي هيك فرجينا لنشوف

ففكت الزوجة حبل الكلب وراح هربان الى جهه غير معلومة وبعد شوي  رجع الزوج مع كلب آخر نفس شكل الكلب السابق فقال لزوجتة: خير يازوجتي العزيزة

فقالت :هدول الرجال عاوزينك ....

فقال التاجر: أي أنا أجيت لعندك لأشتري هل كلب

قلوا الفلاح : هاد الكلب بمثابة الموبايل عندي وهو غالي كتيير لأنه ما بكون خارج التغطية يعني وما بدفعلو رسوم آخر شهر

فقال التاجر :بدفعلك حقوا أد ما كان ،،..

فقال الفلاح: سعره 30000 ليرة سوري  فوافق التاجر بدون تردد .......

فقالت الزوجة بينها وبين زوجها :  دخلكون وقعنا بورطة أكيد لح يكتشفو الخدعة

فقال الزوج:لا تاكلي هم لعيونك 

راح التاجر عالبيت وهو سعيد بالكلب وخبر زوجتة بأمر الكلب

فقالت زوجة التاجر: خلينا نجربو  وبالفعل فكوا الكلب  آم هرب ودغري عرف التاجر انه وقع في عملية نصب كبيرة فعصب وراح مع اثنين من عواينية لعند الفلاح ودقو الباب

ففتحت زوجة الفلاح الباب

فقالوا لها: وينو

فقالت يلله  ما بتقولو إلا أجى 

وبعد انتظار نصف ساعة  شرّف الزوج...

وقال لزوجتة ليش ما ضيفتي الضيوف روحي انتتري ساوي كاستين شاي 

فقالت الزوجه  هدول ضيوفك ألك وشرف حضرتك ساويلهن الشاي

عصب  الفلاح وطلّع  سكين من جيبه وطعن زوجتة وبحت هل دم بالأرض ... طبعا هي خدعه جديدة

فقال الرجال: شو جنيت  تقتل زوجتك لأنها ما ساوت شاي

فقال هي  هيك كل ما عصب منها بقتلها

فقالوا شو يعني قاتلها عل خالص أبل هل مرة

قال الفلاح نعم

ضحكوا التجار وقالو له  شو عم تتضحك علينا كيف هي ؟؟؟    

فأخرج من جيبته صفارة وراح يصفر فيها قام وقفت زوجته ما فيها البلى  أندهش التاجر وقلوا

بدي أشتري هل صفيرة

فقال له الفلاح ب 10000 ليرة سورية  فوافق واشتراها

 وبعد ما طلعوا من عند الفلاح قال صديق التاجر بدي خوف مرتي وجاي عبالي جرب هل صفارة فيها

فأعطاه التاجر الصفيرة

وبالفعل راح هل الأبضاي قتل زوجته وضل طول هليل عم يصفر دون جدوى

وتاني يوم سألو صديقه التاجر شو أخبار الصفيره  فجاوبه خيالية شغلة وفعالة { خاف ينكشف أمره أنه قتل مرته}

فقال الصديق الآخر: وأنا لح جرب هل صفيرة بمرتي اليوم فوافق التاجر

وطبعا المأساة تكررت

وأخذ التاجر الصفارة وذهب لعند مرته ودبر شي مشكله معها  وقتلها .. وأخذ الصفارة وأخذ يصفر ولكن للأسف خلص ماتت  عصب التاجر كتير وراح لعند الرجال ليخبرهم شو صار معوا فقالوا ونحنا كمان  قتلنا حريماتنا بس خفنا نخبر وننفضح وهل فلاح نصاب كل ما نروح لعنده بقصه بجبلنا نصبه أكبر

فأخبر التاجر اهل المدينة بالموضوع  فقرروا  اهل المدينة الانتقام من الفلاح وراحوا لعنده علبيت 

طلع  الفلاح ومعة خدعة جديدة...بس  قبل ما يحكي الفلاح ربطوه وحطوه بكيس وأخدوه وبدهن يكبوه بالبحر وعند الظهر قرروا ان يرتاحوا تحت الشجرات شوي فناموا جميعا ...وسمع الفلاح صوت اغنام قريبة منه وصار يقول بصوت عالي : ما بدي  اتزوج بنت الملك ما بدي  اتزوج بنت الملك

ومن الفضول قرب هل راعي من هل كيس وفتحوا

فقال للفلاح: شوفي شو القصة  شو هي هيك

فقال له الفلاح ما بدي  اتزوج بنت الملك  عندي  بنت عمي بحبها وما باخد غيرها

فقال الراعي : شو جنيت لك هي بنت ملك  يعني عملة وجاه

فقال الفلاح:إذا عاجبتك بنت الملك فكني وقعود عواضي بهلكيس وأنا بحرس غنماتك طار عقل الراعي من الفرحة وبالفعل دخل عل كيس

 وعند العصر راح  اهل المدينة بالكيس علبحر وزتوه  و رجعوا عل  المدينة.

وتاني يوم بشوفوا هل فلاح جاي عل ضيعة ومعوا 3000 راس غنم  انفلجوا التجار وسألوه شوصار ومنويلك هل غنمات ما نحنا رميناك بالبحر

فقال لهم: رميتوني بالبحر بس كنت قريب من الشاطيء قامت الحورية عطتني هلغنمات !!! بس لو مبعدين من عل شاطئ كانت عطتني غنمات أكتر

فقاللو له اهل المدينة:إذا رحنا عل بحر منحصل على أغنام وأنعام...

فقال الفلاح: طبعا بس حاولوا تبعدوا قد ما بقدروا مشان تحصلوا على غنمات أكتر

وبالفعل راح كل  اهل  المدينة عل البحر وانتحروا وهنن موعرفانين انهم وقعوا في كيد نصاب محترف ! اما الفلاح فهاجر  لمدينة ثانية  وعاش بثبات ونبات وخلف صبيان وبنات وتوتة توتة خلصت الحتوتة حلوة ولافتتوتة .

القصة صحيح طويلة شوي بس الله وكيلكن ما نمت لخليت جدي يكفيلي ياها عل آخر لأن كان ناوي يعملها أجزاء يعني حتى القصة بالتقسيط؟؟؟؟؟.وهية خلصت القصة  من هون نعس جدي ونام وأنا  ما كنت نام  طلعت عل برندة وعملت نفس أركيلة  تفاحتين  وفنجان قهوة سادة وسهرت للصبح  وصبحي توفيق بهل مسجلة وعم يغني خمرة الحب إسقنيها  واشتهيتكون معي .... ودمتم سالمين