مو عرفانة من وين بدي بلش! خلينا نبلش من لما خرب كمبيوتري أول مرة وعلقت الفارة, الماوس يعني,ما يروح فكركن لبعيد, شو فارة ما فارة أي انا من قطة بلتوء, المهم.. علقت الماوس وجمد الكمبيوتر بأرضو,وكبست كل الأزرار ما حرك ساكن, وشلت الفيش ورجعتو ما ظبط , طفيتو وريحتو قلت لحالي يمكن بدو راحة (هلكتو) وشغلتو من جديد جمد على الوندوز ببداية الاقلاع,وما كمل.
عصبت وقلت ولي باينتا الشغلة جد, لانو كل مرة بيجمد فيا بطفيه وبيمشي الحال, بس هالمرة ناويها . تنح وأنا تنحت اكتر منو, وجرب جرب وما يظبط ,يعني لو الو لسان كان صرخ وقلي لك حلي عنييييي خربان خربااان!! بعدين فتت على سيف مود مشان شوف وين المشكلة, بين معي المشكلة بالوندوز, فرمتت الجهاز وعملتلو استعادة نظام وطفيتو ورجعت شغلتو وفتت من الوندوز xp دخل وكبست e انترنيت مشان اعمل اتصال, قام جمد مرة تانية! قلت بصوت عالي لااااااااا طفيتو ورجعت شغلتو رجع جمد عند الاتصال.
رجعت فتت على الامان وشفت شو قصة الاتصال, طلع المودم بدو تعريف! عرفتو وظبطت الاعدادات وطلعت من سيف مود وفتت على الوندوز اكس بي دخل وعملت اتصال نجح ياااااايييي نجح وبسرعة فتت على موقع سيريانيوز وتصفحتو لمدة15 دقيقة قلت حاجة اليوم بلا ما يرجع يجمد ما صدقت ايمتى تلحلح! ورحت نمت بامان مو(سيف مود) مشان ما تفكروني نمت بالكمبيوتر, يعني نمت وبالي مرتاح على اساس اتصلح كمبيوتري.
فقت الصبح وكلي نشاط وحيوية وجبت القهوة وقطعة شوكولا وجهزت حالي للاقلاع مع سيريانيوز وإذ...بيجمد الكمبيوتر بمجرد ما كبست على زر التشغيل ما أقلع أقلعت أنا وهو ضل بأرضو!! واختفت الشاشة وصار يضوي ويطفي وطلّع صوت قلت ولييييييي رح ينفجر شو صرلو؟؟طفيتو من زر التشغيل كبسة طويلة,ورجعت شغلتو لا اقلع ولا ضوى ولا من تمو ولا من كمو!!جنيت واصريت اني شغلو ولو انفجر بمحلو..بدي شغلو يعني بدي شغلو..فكيت الكي س وشفت المودم فيو شي او كرت الشاشة؟ عملت حالي بفهم بهل لمصلحة! وقنعت حالي انو ما فيون شي,وخمنت العطل من قطعة الرام الذاكرة عم تعلق وبدا تبديل, سكرتو لـلـ كي س وأخدولي ياه لعند محل تصليح الكمبيوترات (وأخدوك يا حبيب البي مني خلوني أدوووب)
المهم..المصلح رجع فرمتو ونزّل وندوز وعرف المودم متل ما عملت أنا بس ما عمل اتصال ما جرب,وقال إذا بيرجع بيجمد رجعولي ياه لشوف وين العطل؟ وأول ما شغلتو فور وصولو لعندي فتح الوندوز وكلشي تمام وعجبني سطح المكتب منزللي برامج جديدة,ولسا ما كبست اتصال جمد!!! وراحت الشاشة (يا فرحة ما تمت) تاني يوم وصلوه للمصلح,وما اجاني قعود وصبر لحتى يرجعوه, رحت انا لعندو وبدي أعرف شو قصتو؟؟ قلي: رجع جمد؟ قلتلو: وبعصبية لما كبست اتصال جمد وراحت الشاشة,ليكون العطل من المودم؟قلي لا لا قلتلو ليكون من كرت الشاشة قلي لا لا لاني فحصتا,قلتلو هي يلي ورا قطعة الرام؟أنا شاكة فيا؟! قلي طولي بالك وطلب من مساعدو يجبلي كرسي اقعد,قلتلو لاااا ما فيني اقعد بدي اعرف السبب,قلي طيب طيب انتي عطيني رقم هاتفكن وانا بخبرك اذا الرام فيو عطل,قلتلو بس لا تطول, قلي ليش مستعجلة؟؟ ما عرفت شو جاوبو! مو معقول قلو اني مساهمة بسيريانيوز وبدي شوف شو صار بغيابي واذا نزلولي مساهمتي بقسم فشة خلق بعنوان(رسالتن رسالة وسري للغاية)!!
اكيد رح يضحك علي, (أرسلت المساهمة قبل ما يخرب كمبيوتري) قلي ممكن انتي تريحي حالك وانا بخبرك شو بيصير معي, وصلّي الرسالة بكل ادب! بدو يخلص مني, ورجعت على البيت,وبعد نص ساعة بالضبط اتصل وقلي كمبيوترك ظبط وطلع العطل من قطعة الرام, مو كلها قطعة وحدة منا راما شو بتحبي غيرها؟ قلتلو طبعا غيرها,قلي رح حطلك قطعة الرام سعتها 512ميغا, قلتلو ماشي المهم يظبط وما يرجع يجمد,قلي لا لا انشالله ظبط,وشكرتو على صبرو وعلى سعة صدرو, ووصلني الكي س بالسلامة بعد غياب يومين وشغلتو وكبست اتصال ما جمد اسم الله ويخزي العين, وها أنا معكن على الهواء مباشرة أهدي سلامي وأشواقي إليكم والسلام عليكم.
