بشوفك بساعة غروب
بتمرء خيالاتك
ع رمل الطريق
بتخربش على الحيطان
بتقتل النسيان
وبترجع تفيّئ
الحب العتيق
بيرجّع الصيف اللي راح
يفرد ع ارض البرد ساحاته
يمرّمغ جناحاته
على المقعد
يتكسّر الليل
بضو القمر
يتبدل الاسود
بشوفك ع هالمقعد
بقعد معك
بقرّب على خيالك
بتلمّسك بتسمّعك
وبكتب ع غبرات اللي كان
يا هالزمان
خفف جنونك ع طرقات العمر
بنقش شعر
بكتب الماضي
وبنشر عطر
بكتب بحبك
بقلب الشمس وقت الغروب
لتزهّر قمر بالليل
لتزهّر قلوب
حتى الشمس لو غابت
رح يبقى حبك
ع هالمدى مكتوب
وببقى انا ناطر
ناطر ومصلوب
ناطر رجوعك
وناطر الصيفية
يمكن يا هالمقعد
بشي ليلة منسيّة
تنشّف البرد اللي فيك
ويمكن بقلبي
تحرء الشتوية
وترجع حكايات
ترجّع اللي مات
تكسّر سكوتي
تصرّخ بموتي
بحبك بحبك
يا ريت بقدر ازرعك
شجرة تفيي على قلبي
تفردي وراقك
على دربي
خليني اكتب
ع هالزمان حروف
خليني ذكّر
بالأمان الخوف
خليني اكتب بحبك
وباقي معك قلبي
باقي معك
الباقي من عمري
باقي معك
حتى لو ما بشوفك
باقي معك حبي
