انحرمت الضنى

تحملت العنا

وشو ذنبي أنا

ما خليت لا دكتور ولا طبيب

وسمعت نصيحة البعيد والقريب

وطلبت الدعا من الصديق والحبيب

بس كل مرة أملي كان يخيب

كان كل حلمي أحمل طفل ببطني

واسمع كلمة أمي

تمنيت توج زواجي بولد

يشبه أبوه ويحمل اسمه

وشوف صورة حبيبي بتفاصيله وبرسمه

أو بنت تحمل صفاته

وتحقق أحلامي وأحلامه

وحتى معي ما أظلمه

بأيدي زوجته

ولما أهل العروس سألوني

قلتلهم أغلى من عيوني

وقلتلها مثله رح تكوني

وغلاتك من غلاته

جهزته وزينته

وكنت أكثر من رقص بعرسه

شرقي وغربي ودبكة

ودست قلبي وهو عم يبكي

وبعد فترة

هلت البشرى

وقلت رح شوف الفرحة

وابن زوجي هو ابني

وبكرا بيصير يناديني أمي

بس أجا كابوس وصحاني

وحبيبي عنه بعدني ورماني

وأشوف ابنه من غيري ما خلاني

وورقة طلاقي

كانت جزائي

رجعت لأهلي

حاملة قهري

وعم يدور بفكري

لو كان محلي وكنت محله

ترى رح اعمل كنت مثله؟

ولا همي هو همه

والولد ما بدي ياه إذا مو منه

بس هيك الحياة

وأنا هذا نصيبي

وهيك اختارلي ربي

وأنا رضيت بحكمه

ودايماً بدعي

اللهم إن لم يكن بك غضبٌ علي فلا أبالي

فلا أبالي