بذكر لما كنت صغير بيي قعدني بحضنو
تركني بلحظة تفكير رجعت وقربت منو
قلي الوطن غالي كتير وللوطن إنت إبنو
ولا تنسى لومهما يصير سيفك للوطن سنّو
يا إبني الوطن بستان الوطن شرف للإنسان
الوطن أغلى من أهلك وأرفع من كل الأديان
الوطن لوحة كرامة مرسومة بأحلى الألوان
رسمها وأبدع فيها ولونها ربّ الأكوان
يا إبني الوطن مالك وأغلى عليك من حالك
أسمى من كل شي بالكون ومن ولادك أغلالك
لما تكون أرضو بخير رح يبقى فاضي بالك
رافع راسك فوق الغيم ولا كلمة سوء تطالك
الوطن حضن أجدادك ورح يغمر خيرو ولادك
ورح يرجع يحني ويضم بحضنو الدافي أحفادك
ولو فكرت تهاجر يوم خلي غلاتو زادك
تذكر مهما طال البعد لازم ترجع لبلادك
يا إبني الوطن عزك حافظ عأرضو بدمك
وكرمال تحمي حدودو لا تخلي الموت يهمك
ولو قدمتلو روحك رح يرجع حضنو يضمك
حتى لو حاربت الكون كرمالو بيبقى يمك
يا إبني الوطن شامخ متل النسر اللي بالسما
وناطر بزنود رجالو نزف جروحو يبلسما
إدلب درعا حلب الشام طرطوس وحمص وحما
كل الطوائف إخوان بلاد العالم علّما
وهلأ يا بيي تذكرت كل كلمة قلتا وكل حرف
حسيت بقيمة حكيك وصار الدمع بعيني ذرف
للأسف الوطن ولادو دبحوه وبلش هالنزف
طعنوه كل مين بسكين وتركوه عحدود الجرف
يا سوري راعي وطنك بيكفي تنهش من لحمو
وتذكر إنو عرضك وإنت ولدت من رحمو
تذكر إنو السوري أخوك إيدو وإيدك يلتحمو
ولازم بروحك تفديه بدل ما تشرب دمو
يا الله الخالق هالكون يا رب الدنيا العالي
تنقذ يا ربي وتصون وتحمي وطننا الغالي
يا ربي ما في غيرك بعطفك حقق سؤالي
يا ربي إلطف بالناس طمني وريح بالي
