كان يا ما كان، بدي احكي يعني بدي احكي، يلي ما بدو يقرا هو حر  فيه يروح ينام،  بتعرفو شو؟؟؟ إحساس كتير بشع إنو تفيق من النوم على صوت عم يهز الدنيا، المفروض الواحد يفيق متفائل ونشيط ليروح على أشغالو، يعني الموظف على وظيفته والطالب على جامعته والتلميذ على مدرسته

 بس إنه البني آدم بعد ما يفيق على صوت متل هل صوت، يحاول يبقى بهمة عالية ويجهز حالو ويطلع من بيتو بكامل أناقتو  ويبلش بقا يشوف غيمة سودا على طول الطريق بهل سما، غيمة سودااااااااااا كتير وبجد منظرها مرعب، والناس بدل ما يروحو على أشغالون واقفين منبهرين بهل منظر، يعني نحنا بهل ظروف مو  ناقصنا غير عجقة وزحمة مشان تكمل معنا

 والحلو وبعد كل هل شي بدك اضل محافظ على روح معنوية عالية ونشاط وحيوية، وبما إنو صارت طرقاتنا كلها حواجز واضطرابات (طبعاً وبين قوسين، نتيجة الحرية يلي وصلنالها بعد ما بلشوا المجاهدين بهل بلد تحرير لسورية المغتصبة) وكمان بين قوسين (شلون ما بدكون افهموا قصدي) ما نحنا صرنا بزمن كل واحد عقلو إلو، وكل واحد بيفهم على كيفو وبتبلش المواهب التحليلية تطفو على السطح، مع شوية سمك، وعلى سيرة السمك، لك كلو غليان، الجاج واللحمة والخضرا باستثناء البني آدم؟؟؟

المهم ما لنا بطول السيرة... وكنا عم نقول إنو لازم نحافظ على روح معنوية عالية، فنحنا على الطريق بوقفنا أول حاجز وبما إنو كان في تفجير تازة فالشباب الطيبة معصبين وما عم يتحاكوا وصراحة ما فيني لومون بس بقول الله لا يسامح كل واحد كان الو ايد بكلشي عم يصير،  يلا  هلأ  بنطلي حدى وبقلي حضرتك مؤيدة أو معارضة، بحب قلون، لك بكفيييييييييييييي بقا، البلد عم تحترق وبعدكون عم تقول مؤيد ومعارض

 لك أنا ما بخجل قول إني بحب هل بلد وبدي خير هل بلد ويلي عم يصير قمة الغلط لأنو  الشعب هو الخسران أولاً وأخيراً، ولو بعرف إنو هل جنان يلي عم يصير رح يعطينا ولو ميزة وحدة كنت من أول من يسعى لهل حرية المزعومة، وعلى فكرة هلأ نحنا عم نحصد ثمار الحرية، بجد ثمااااااااااار غير شكل، كل شوي تفجير، وناس عم تنزح وناس عم تموت وناس عم تنخطف وطرقاتنا نصها مسكرة ونصها حواجز، والأحلى إذا هل أطفال ما راحت على المدارس، لك يااااا عيني شو رح يطلع جيل ببيض الوش، لك نحنا تعلمنا وشوفو هل جواهر يلي عم تطلع معنا، فشلون إذا هل جيل ما تعلم، أكيد هل شي بساهم ببناء سورية حديثة ومتحررة!!!!!!! لك تئبر ألبي هل حرية، لك حتى من بيتنا ما عم نطلع إلا للضرورة القصوى، حدى يشرحلي بقا هي هية الحرية؟؟؟