طمني عن حالك يما. نحنا ما عنا عيد لأنه عيدنا يوم تتحرر أنت ورفاقك.
يا حبيبي أولادك ومرتك واخواتك كلهم بخير، اشتاقولك ، وأنا لو تدخل قلبي لتشوفوا نار شاعلة، عم اشعر بألم غريب ما بقدر على وصفه . مثل طلوع الروح ، مثل جرح عم ينزف، وما بدو يوقف لتجي وتحط ايدك عليه يما. وجع مثل سيل عم يهدر، أنا خايفة وبالي مشغول عليك .
بالله عليك تعال ولو شوي، اكحل عيني فيك، اشمك، اضمك واخبيك في قلبي وما حدا بيقدر يطلعك منه. هو أنت طول عمرك فيه يا بعد عمري، بس غدروا فينا واخدوك. يا ريتني خليتك صغير جنبي.
يما صحيح الوطن أهم وكبير، بس الله أكبر وراح ينصرنا ويرجعلنا حقوقنا. راح يقويك ويحميك أنت ورفاقك، لأنه الله ما بيضيع تعب حدا والكافر له يوم يما.
ابنك كبر وصار يقول بيي. يا أمي ما بحب اسمع منه غير ها لكلمة. يما ما بدي أنسى اقولك أنه شرف البني آدم وعزه أن يحمي اخواته وأهله وأنت رفعت رأسي. بيضتلي وجهي قدام الناس يما. أنت فدى الوطن أقولها واقصدها يا أمي، بس يا ريتني أنا فداك لحتى يعيش الوطن، وترجع أنت، ومو مهم اموت أنا لأنه شبعت من الدنيا، كبرتك أنت واخواتك، بس أنت بعمر الورد يما. يا حيف على عمرك وطلتك وضحكتك يا غالي، يا حيف لأنه ما بنعرف طعم الحرية مثلكم.
أنتم أسرى بس تحررتوا من الخوف والذل والهوان اللي عم نعيشه كل يوم يما.
أمي لا تواخذني لأنه طولت عليك الحكي، بس أنت طولت الغيبة علي بعرف أنه مو بأيدك ، بس تذكر أنه أنت بأيد ربنا يما. كل ساعة بدعيله يحفظك ويرجعك بخير مع رفاقك يما. والله ما بيوم ردلي طلب لأنه بيعرفني مالي شر على حدا، بيعرف إني خلفت بطل، والأبطال يا أمي طيبين بيحموا الشرف والكرامة. الله بيباركهم، صدقني يا حبيبي الله بارككم وراح يرجعكم عن قريب . كل عيد وأنت طيب يما.
