الحلقة الثانية من مسلسل الفيسبوك الكوميدي:

المستثمر بعد ان ردت التحية ب: هاي تشقلبت فرحته فبدأ يشرأب (لازم خطة محكمة لضمان التطبيقة)

المستثمر:كيفك (خير الكلام ما قل و دل)

الانثى :تمام انت كيفك (كمان خير الكلام ما قل ودل)

المستثمر بكل زرافة يعني ظرافة واحترام يقول :

شكرا على قبولك طلب الصداقة (لاقيلي ولا تطعميني)

الانثى :ولو اهلا وسهلا

المستثمر بعد ان يعرف على اسمه ومكانه يسأل ببلاهة انت شو اسمك(واسم الانثى مكتوب وبيقلع عين ابليس)

الانثى وببلاهة لكن من نوع اخر تجاوب باسمها مجاوبة على تعريفه باسمه :تشرفنا

يستطرد المستثمر من ذكائه الخارق المنطوي تحت فكرة (التطبيق) يقول :

انا شفت صورك وانت كتير حلوة بس حاسس بعيونك في حزن وحاسك بدك تحكي بس ما فيكي تحكي ....(على اساس ما في حدا مرتاح بهالدني)

الانثى :بذكاء ايضا بدون تفكير ......

تقول : انت كتير حساس ..يالله شو عرفك انت خطير كتير ...(انفشو وشوف ما اجحشو)

المستثمر ببلاهة جديدة ولكن بلاهة منغولية هذه المرة ..........

يقول:ههههههه والله بحس انو الدنيا علمتني كتير ......(على اساس مقضى لمصدى)

الانثى :اي والله معك حق الدنيا كتير قاسية وبنضطر نتعلم ونحنا صغار....(يا حبيبي اكلة الطعم )

هنا يقلب المستثمر الطاولة على بلاهته قائلا بنفسه (هاتي لنشوف كيف بدنا نبلش)

ويسأل الانثى :شو هالحزن اللي بعيونك عن جد كتير مبين لدرجة انو في دمعة بعيونك (بلش يستشعر اخونا )

ترد الانثى هنا بلباقة انثوية قائلة: ههههههه مو لهالدرجة (شبو اندلق بفرد دلقة)

وتستمر بالكتابة قائلة:انت شو بتشتغل (انو فهمنا لسا ما بلشنا)

المستثمر محاولا شد انتباهها بطريقة لولبية وجمبازية يذهب الى الغوغل ويفتح على الترجمة

ويكتب ترجمة من العربي الى الانكليزي ويكتب مثلا تاجرة واقتصاد فيقوم بنسخ الترجمة ويكتبها لاهسا

على التشات (لحقي اذا فيكي تلحقي نحنا اللي بنحكي انكليزي)

الانثى مسرعة بتعليم الجملة ذاهبة الى الغوغل مختارة الترجمة من الانكليزي الى العربي

فيتبين لها تجارة فتعود للتشات وتكتب :تجارة واقتصاد برابو فرع حلو (على اساس انو عرفت الترجمة لحالا)

المستثمر متباهيا بدراسته وايام دراسته الفتانة :والله انا كتير بحب التجارة وكنت شاطر كتير فيها لان كان حلمي ادرس تجارة (يقبرني مو على اساس كنت تحلم تسجل طب بحكمك مواطن سوري وعلاماتك وديتك لهون وبعدين شو مشان معدلك 50.4)

الانثى:والله كتير حلو الواحد يطمح ويحقق طموحو (رجعنا لفكرة انفشو وشوف ما اجحشو)

المستثمر وهو يعتز بنفسه رافعا رايات النصر مصدقا كذبته قائلا :اي والله انا من النوع اللي اذا حطيت ببالي شغلة لازم اعملها ومن صغري عنيد وبحب التجارة(اي يقبرني كان عم يرضع قانون تجاري ويتحفض بالمالية العامة)

الانثى مستغلة نقطة العند قائلة:عنيد معناها عقلك صعب ههههههههه(لازم تضحك مشان ما يفكرا مسبة )

المستثمر واضعا يده يهرش بشعره المنكوش مدافعا عن نفسه بهضمنة قائلا:هههه لا بالعكس اجتماعيا كتير متفهم وماني متزمت وبحب النقاش وما بعاند(تقبر قلبي شو متفهم حتى اسألي اخواتو عنو...)

الى اللقاء مع الحلقة الثالثة من مسلسل الفيسبوك الكوميدي

الممثلين حسب الظهور المستثمر الذكر

الانثى

سيناريو وحوار واخراج:سموأل ملحم