الحلقة الرابعة من مسلسل الفيسبوك الضاحك :

هنا وبما أن المستثمر البطل سأل الأنثى عن رأيها في الحب ترد الأنثى قائلة :

 حب لك والله الحب شي حلو بس والله ما عاد في حب ولا حدا بيستاهل يحب (جواب تقليدي لكائن يعيش في مجتمعنا المذهل) ينفنجر المستثمر الذكر عيونه وهو يبتسم ابتسامة شريرة (اهلين فيكي في حضنك الحنون ) ويقول بنباهة مؤقتة: عم قلك انو في بعيونك زعل بالرغم انك عم تحاولي تخبيه وما عم تحسني تخبيه (فنان بالعيون وسر العيون ..ألاهي يحميك)  

هنا الأنثى تقرر أن تنقل ما يجول بداخلها ولكن بحذر شديد : قلتلك مو لهالدرجة ...بس أحيانا بحس انو أنا مظلومة وما حدا بيقدر حناني (كلكون بتحكو هيك ولا تزعلو كمان الشباب بيحكو هيك )

 يتخلى هنا الذكر عن نباهته التي هي بالأصل ليس سوى لحظات خارجة عن طبيعته و يقوم بكتابة عبارة خيالية ..يقول: لا بالعكس أنا حاسس انو أنت حنونة كتير ولا تحزني علي باعك لان ما بيستحقك (يا حنون انت يا ياحنون قلب فرويد اخونا )  

تفكر الأنثى بجواب غير تقليدي مراعية عدم تضمين الجواب أي إحساس عن ماض لها فتقول: لا تفكرني مجروحة من حب قديم أنا بالأصل ما كان بحياتي علاقات طويلة وكل علاقاتي أنا اللي نهيتا بس إحساسي بالظلم لان أنا حنونة كتير .......(يا حبيبي عليكي شو مشان انو كل العالم بتقول نحنا اللي فرطنا العلاقة )

يقرأ الذكر ما كتبته ويمعن النظر نافخا ما تبقى من دخان سيجارته منتبها بذكاء خارق إلى جمع كلمة علاقة ويرد قائلا: علاقات ....ليش كان بحياتك علاقات كتير ؟؟؟؟؟(ايوا طلع عقدك يا روح عمك )

 تغضب الأنثى بقرارة نفسها على أن هذا المستثمر لم ينتبه على انها حنونة وانتبه للعلاقات فتجاوب : شو قصدك ....شو مفكرني قاتلة حالي على الشباب مثلا(يا لطيف تلطف انطعجت من جحشنتو) ينتفض المستثمر وهو يصدر فحيحا من فمه ضاربا على رأسه ويحس بأنه أخطأ فيقول: لا ما قصدي هيك لا تفهميني غلط بس كنت عم اسأل مجرد سؤال ......(فهمان البركة على أساس حل الموضوع) الأنثى مستمرة بحالتها الغاضبة : لا ما فهمتك غلط كلامك واضح وصريح وما لو غير معنى واحد ...يعني متل ما فهمت (يا عمي زعلت وانتفضت واحتدت) يستنفر المستثمر كل إمكانياته الخارقة في البحث عن طريقة للاعتذار وتبرير ما اقترفت يداه فيقول: والله مو قصدي شي بس سألتك عن علاقاتك إذا زعجتك أنا أسف ...(على أساس انو آخر شي الاعتذار أحسن شي)

 تهدأ الأنثى قليلا ولكن بحذر وتقول: لا تتأسف عادي أصلاً مجتمعنا كتير متردي وبالأخر نحنا عم نكتسب من هالمجتمع كتير شغلات سيئة (لك يعني ماجبرتينا نقول اللي في شوكة بتنخزو) هنا يدرك المستثمر بأنه تلقى الشتم فيغضب بطريقة حنونة مبديا أنها تظلمه إلا آن يتغلل بالأنثى ويريها العصبية الحقيقية ويقول: الله يسامحك أنا ما بحب عادات هالمجتمع وأنت هيك عم ترجعي تظلميني وبرجع بقلك انو مو كل أصابعك متل بعضا (رجع أخونا يمتل ويبكي ويشتكي)

 ويستهل كلامه برسالة أخرى ويقول : شو رأيك نغير الموضوع ........(غيرو أحسن ما يكون أخر موضوع) تضرب هنا الانثى بكلامه عرض الحائط وتجاوب بطريقة عدم الرجعة إلى الموضوع : أنا آسفة إذا زعجتك يمكن أنا متدايقة شوي عادي ولا يهمك (بيجي يوم وبدك ترجعي وتحاسبي ) وأنا مضطرة روح عندي شغل بنحكي بعدين ...... يعصر المستثمر أفكاره المتضاربة ويقول : عادي ولا يهمك والله أنا مقدر شعورك متل ما بدك بنحكي بعدين .....(على أساس تركها على راحتها لتعلق بعين الله ) انا بفوت الساعة وحدة بالليل ....بشوفك بالليل ؟؟؟؟ الأنثى : إي انشالله اوكي باي المستثمر الذكر : اوكي باي

 إلى اللقاء مع الحلقة الخامسة من مسلسل الفيسبوك الضاحك

 الممثلين حسب الظهور ......المسثمر=الذكر الانثى

 سيناريو وحوار واخراج : سموأل ملحم