كشة حمام شامية
طار الحمام وعلا بقلب كشة شامية
ورجع معو ضيف جايي من كشة حلبية
وشاف الحمام بالشام جنة خضرا منسية

شلحها الزمن عن كتافو وحطها عراسو كوفية
وصارت تاج يلمع من دهب وحروفو فضية
وكلما تطلع حدا لفوق بيغشى البصر والروس محنية
هيك الي بيعيش تحت اد ما تطلع لفوق بدا تضل راسو محنية

وهيك الي على الراس بيكون فوق الكل وبقدرة الهية
هي القافية ما عم تتركني القافية اليائية
ما كل ما بنحكي عالشام منقول هي هيي
والمرا الحلوة بنقول عنها والله يمكن هي شامية

والطبخة الطيبة بيقول الناس هي طبخة شامية
ولك كل الدني بيكون عهدها جديد وعندها عنصرية
بس الشام أقدم من الكل ولساها متواضعة وعفوية
ولك الشام الله حاميها والملايكة بتزورها يومية

لاتحاولو تغيرو فيها ما بتتغير متل الصخر هيي
ولي بيزورها مرة بتصير بلادو حكاية منسية
مشان هيك في بقلب الشام عوائل اجنبية وتركية
ومشان هيك الشام اجزاء مطبوخة مصهورة بحرية

الشركس والارمن والاتراك والعرب والخليجية
ومشان هيك الحمام بيعيش فيها بانواعو عيشة هنية
والله بيحب الشام وبيحبها من اهلها الجماعات الكردية
والمسيحي فيها من زمان بيمارس طقوس كنسية

وبيصلي بالجامع وبيزين حيطان بيتو بايات قرأنية
والمسلم بينام بسلام ببيت اليسوع مع اخوتو المسيحية
بس الحمام وأهل الشام بيعرفو شو بتعني هيي
وبس يلي شرب من مية الشام بيعرف معنى الحميمية

مويلي عايش برا البلد وبيشرب ذل و مي معدنية
وكل يوم بينبح علينا وبينادينا حيا على الحرية
والله وجعنا صوتك وصوت الحمير احن بشوية
حاج تتاجر بالشام واهل الشام ما رح تربح الأرضية

خسرت يوم استقويت علينا بالغريب هي فعال دونية
وخسرت لما الدم رسم عالأرض حكاية شرف بحروف سورية
وبكرا بيعترف الزمان وبيقول بصرخة عالية مدوية
ما غلطت لما حطيت الشام عراسي وبيلبقلا هيي

ورح يحج العرب يزورو شموخ الشام مو عالسعودية
وبيرجع العالم بيحلم يزور ارض الخلود السورية
وبس يلي براسو شرف بيفوت والباقي زبالة منسية