-         الناس مصطفة على الأفران بشكل حضاري لا تدافع ولا سباب و لا لكش ونبز و لبز وهمز  ولا ضرب كمان  والكل يأخذ حاجته دون زيادة حتى يتمكن كل الناس من الحصول على مادة الخبز لإطعام عائلته....(المواطنة في مادة الخبز)

-         على الباصات و السرافيس الشباب بشهامة العربية و النخوة الأصيلة لبعض منهم وانأ مش عم عمم لان التعميم لغة الحمقى يفسحوا المجال لصبايا لتطلع دون غمزه من هون ومد أيد من هون شهامة!!!!

-         شرطي المرور عارف واجبه تمام يعني ما بوقف السير و بيعمل اختناق مرروي كرمال 100ل.س البلد ناقصها عجقة (الشرطي أكيد راتبه مكفيه)

-         المواطن بيعرف شو اله وشو عليه تمشي معاملته بدوائر الحكومية دون ما يرشي أو يسب و  يذم الموظف والموظف فهمان واجبه تمام يعني شغلته الخدمة العامة دون مقابل لا رجع بكرى و لا بعد أسبوع و لا بعد شهر ولا طابع ناقص ولا مين باعثك (يعني مش عم يتحسن على المواطن)

-         ما في انقطاع بالتيار الكهربائي أبدا والطلاب ما عم تدرس على ضوء الشواحن و الشموع (أجواء رومانسية بتساعد عالتأمل و التفوق) وأكيد المازوت متوفر والناس شاعرة بالدفء و الأجواء الحميمة بليالي الشتي الباردة و البنزين كثير متوفر و ما في حلبات مصارعة على الكازيات والسائقين ما عم يعبوا كالونات اضافية!!!!

-         قانون التقاعد المبكر صدر بشكل إلزامي مش بشكل اختياري وصار فيه الآف فرص العمل للخريجين الجامعين  و تراجعت البطالة وصنفنا عالمياً من بين اقل الدول في مستوى البطالة و أتهافتت الدول على الاستفادة من تجربتنا بهذا المجال!!!!

-         ما في واسطة بالمسابقات الكثيرة المعلن عنها ولا في أنت من قبل مين وأنت أديه بدك تدفع المعيار الوحيد للنجاح الكفاءة و الخبرة (الناجحين مش معينين مسبقاً)

-         احد الوزراء قدم استقالته لأنه اضر بالمصلحة العامة وقصر بالعمل وأعلن فشل عمله دون ترحيل المسؤوليات وتقديم المبررات. (جديدة علينا!!!!)

-         في تخطيط  سليم للحكومة بحاكي كل الجوانب التي تهم المواطن وترفع مستوى معيشته و في برامج فاعلة للمكافحة الفقر والظلم الاجتماعي و تمكين المرأة!!!!

-         أعضاء مجلس الشعب همهم الأول و الأخير مصلحة المواطن يعني عضو مجلس الشعب ساهر و مكرس كل طاقاته لخدمة المواطن و المطالبة بحقوق الشعب يعني ما بهمه لا الامتيازات ولا النفوذ و لا السلطة يعني عضو مجلس الشعب لسان المواطن!!!

-         وحلمت .... وحلمت!!!! ولكن أهم ما حلمت....

 بأن الوطن قد قبل زواج سلامه من حريته وجعل الكرامة دينه وملته و بأن ياسمين الشام لا ينزف ....وبأن سوريا الآن هادئة المنام.